વોશિંગ્ટન : ગાઝા પટ્ટીમાં ચાલી રહેલા ભીષણ યુદ્ધ અને તબાહી વચ્ચે ટ્રમ્પ વહીવટીતંત્રના પ્રતિનિધિઓએ એક અત્યંત મહત્વકાંક્ષી અને ભવ્ય પુનઃનિર્માણ યોજના રજૂ કરી છે. ‘પ્રોજેક્ટ સનરાઈઝ’ (Project Sunrise) નામની આ યોજના હેઠળ યુદ્ધગ્રસ્ત ગાઝાને આગામી ૧૦ વર્ષમાં એક આંતરરાષ્ટ્રીય સ્તરના ફ્યુચરિસ્ટિક ડેસ્ટિનેશનમાં ફેરવવાનું લક્ષ્ય રાખવામાં આવ્યું છે.
૧૧૨ અબજ ડોલરનો મેગા પ્લાન અને યુએસની ભૂમિકા
ડોનાલ્ડ ટ્રમ્પના જમાઈ જેરેડ કુશનર અને અમેરિકી વિશેષ દૂત સ્ટીવ વિટકોફ દ્વારા તૈયાર કરવામાં આવેલા ૩૨ સ્લાઈડના આ પ્રેઝન્ટેશનમાં ૧૧૨ અબજ ડોલરના ખર્ચનો અંદાજ મુકવામાં આવ્યો છે. આ પ્રોજેક્ટમાં અમેરિકા પોતે ૬૦ અબજ ડોલર ગ્રાન્ટ અને દેવાની ગેરંટી તરીકે આપવા તૈયાર થયું છે. બાકીની રકમ રોકાણકાર દેશો પાસેથી મેળવવાનું આયોજન છે.
ગાઝા બનશે ‘સ્માર્ટ સિટી’: લક્ઝરી હોટલ્સ અને AI ટેકનોલોજી
વોલ સ્ટ્રીટ જર્નલના અહેવાલ મુજબ, આ પ્રોજેક્ટનો મુખ્ય ઉદ્દેશ્ય ગાઝાના દરિયાકાંઠાને લક્ઝરી રિસોર્ટ્સ અને હાઈ-ટેક મેટ્રોપોલિસમાં ફેરવવાનો છે. જેમાં નીચે મુજબની સુવિધાઓનો ઉલ્લેખ છે:
 * AI સ્માર્ટ ગ્રીડ: આર્ટિફિશિયલ ઇન્ટેલિજન્સ આધારિત ગવર્નન્સ અને સેવાઓ.
 * ટ્રાન્સપોર્ટેશન: ગાઝામાં અત્યાધુનિક હાઈ-સ્પીડ રેલવે નેટવર્કની સ્થાપના.
 * ઈન્ફ્રાસ્ટ્રક્ચર: લક્ઝરી હોટલ્સ, ઇનોવેશન લેબ અને સ્ટેટ-ઓફ-ધ-આર્ટ શહેરી ડિઝાઇન.
પડકારો અને ૨૦ લાખ લોકોનું સ્થળાંતર
આ યોજના જેટલી ભવ્ય છે તેટલી જ પડકારજનક પણ છે. ગાઝામાં અત્યારે અંદાજે ૬.૮ કરોડ ટન જેટલો કાટમાળ પથરાયેલો છે. આ મહાનગર બનાવવા માટે ત્યાં રહેતા ૨૦ લાખ પેલેસ્ટાઈન નાગરિકોને ક્યાં વસાવવા, તે અંગે પ્રેઝન્ટેશનમાં કોઈ સ્પષ્ટતા કરવામાં આવી નથી. વધુમાં, અમેરિકી અધિકારીઓ માને છે કે જો હમાસ હથિયારો હેઠા ન મૂકે, તો આ પ્લાન માત્ર કાગળ પર રહી જવાની શક્યતા છે.
રાજદ્વારી મંત્રણા તેજ
આ યોજનાના અમલીકરણ અને યુદ્ધવિરામની ચર્ચા કરવા માટે સ્ટીવ વિટકોફ શનિવારે મિયામીમાં ઇજિપ્ત, તુર્કી અને કતારના ઉચ્ચ સ્તરીય પ્રતિનિધિમંડળને મળ્યા હતા. ‘પ્રોજેક્ટ સનરાઈઝ’ દ્વારા ગાઝાને માત્ર પુનઃસ્થાપિત જ નહીં, પરંતુ તેને મધ્ય પૂર્વના સમૃદ્ધિના પ્રવેશદ્વાર તરીકે વિકસાવવાનો દાવો કરવામાં આવ્યો છે.