બેંગલુરુ, તા. ૨૨ : બેંગલુરુ શહેરની વર્ષો જૂની ટ્રાફિકની સમસ્યાનો ઉકેલ લાવવા માટે પ્રસ્તાવિત 16.75 કિમી લાંબા 'ઉત્તર-દક્ષિણ ભૂગર્ભ કોરિડોર' (ટનલ રોડ) પ્રોજેક્ટમાં મોટો વળાંક આવ્યો છે. બેંગલુરુ સ્માર્ટ ઇન્ફ્રાસ્ટ્રક્ચર લિમિટેડ (B-SMILE) દ્વારા ખોલવામાં આવેલી નાણાકીય બિડમાં અદાણી ગ્રુપ બંને પેકેજ માટે સૌથી ઓછી બોલી લગાવનાર (L1) તરીકે બહાર આવ્યું છે. જોકે, અદાણી ગ્રુપ દ્વારા ક્વોટ કરવામાં આવેલી રકમ સરકારના અંદાજિત ખર્ચ કરતા ઘણી વધારે હોવાથી હવે આખરી નિર્ણય રાજ્ય કેબિનેટના હાથમાં છે.
સરકારના અંદાજ અને અદાણીની બોલી વચ્ચે મોટો તફાવત
કર્ણાટક સરકારે આ અત્યાધુનિક ટનલ પ્રોજેક્ટ માટે ₹17,698 કરોડનો ખર્ચ અંદાજ્યો હતો. તેની સામે અદાણી ગ્રુપે ₹22,267 કરોડની બોલી લગાવી છે, જે સરકારના અંદાજ કરતા અંદાજે 28% વધુ છે. આ પ્રોજેક્ટ બિલ્ડ-ઓપરેટ-ટ્રાન્સફર (BOT) મોડેલ પર આધારિત છે, જેમાં 40% ભંડોળ સરકાર આપશે અને બાકીનું રોકાણ ખાનગી કંપનીએ કરવાનું રહેશે. આ હરીફાઈમાં હૈદરાબાદની વિશ્વ સમુદ્ર એન્જિનિયરિંગ બીજા ક્રમે રહી છે, જ્યારે અન્ય દિગ્ગજ કંપનીઓ ટેકનિકલ કારણોસર રેસમાંથી બહાર થઈ ગઈ છે.
વિવાદોના વંટોળ વચ્ચે ડેપ્યુટી સીએમનો ડ્રીમ પ્રોજેક્ટ
આ ટનલ રોડ ડેપ્યુટી સીએમ ડી.કે. શિવકુમારનો મહત્વકાંક્ષી પ્રોજેક્ટ માનવામાં આવે છે, પરંતુ તેની સામે વિરોધના સૂર પણ ઉઠ્યા છે. ભાજપના નેતાઓએ ઐતિહાસિક લાલબાગ બોટનિકલ ગાર્ડનની છ એકર જમીન આ પ્રોજેક્ટ માટે વાપરવા સામે સખત વાંધો ઉઠાવ્યો છે. નિષ્ણાતોએ પણ ચેતવણી આપી છે કે આ ટનલ રોડ મેટ્રો ફેઝ 3A ના રૂટની અત્યંત નજીક હોવાથી ભવિષ્યમાં મેટ્રો પ્રોજેક્ટને નુકસાન પહોંચાડી શકે છે.
આગામી પગલાં અને પડકારો
અદાણી ગ્રુપની બોલી ઉંચી હોવાથી હવે આ ફાઈલ મંજૂરી માટે રાજ્ય કેબિનેટ સમક્ષ જશે. જો સરકાર આ ઉંચા દરોને સ્વીકારે છે, તો બેંગલુરુના ઈતિહાસનો આ સૌથી મોટો અને જટિલ ઈન્ફ્રાસ્ટ્રક્ચર પ્રોજેક્ટ અદાણી ગ્રુપના ફાળે જશે. 40 કિમીના કુલ ભૂગર્ભ રસ્તાઓના નેટવર્ક પૈકી આ પ્રથમ તબક્કો છે. શું સરકાર પર્યાવરણ અને મેટ્રોની ચિંતાઓને અવગણીને આ ખર્ચાળ પ્રોજેક્ટને લીલી ઝંડી આપશે? તે જોવું રસપ્રદ રહેશે.