ચેર્નિહિવ, તા. ૨૨ : યુક્રેનનું શહેર ચેર્નિહિવ અત્યારે રશિયન ડ્રોન અને મિસાઈલ હુમલાઓનું કેન્દ્ર છે. સવારના સમયે જ્યારે હવાઈ હુમલાનું સાયરન વાગે છે, ત્યારે લોકો જીવ બચાવવા આશ્રયસ્થાનોમાં દોડે છે. પરંતુ જેવી ચેતવણી હટે છે, તરત જ 'નોવા પોસ્ટ' (Nova Post) ના કર્મચારીઓ કાઉન્ટર પર પાછા ફરે છે અને પાર્સલ સૉર્ટ કરવાનું શરૂ કરે છે. રશિયાના આક્રમણના ચાર વર્ષ પછી, આ કંપની માત્ર યુક્રેનની જીવાદોરી નથી બની, પરંતુ યુદ્ધના સમયમાં કોર્પોરેટ જગત માટે સફળતાનું અનોખું ઉદાહરણ બની ગઈ છે.
બ્લેકઆઉટ અને વિનાશ વચ્ચે દરરોજ ૧૫ લાખ ડિલિવરી
જ્યારે રશિયન હુમલાઓને કારણે આખું યુક્રેન અંધકારમાં ડૂબી જાય છે, ત્યારે નોવા પોસ્ટ પોતાના જનરેટર અને એલોન મસ્કની 'સ્ટારલિંક' (Starlink) ઇન્ટરનેટ સેવા દ્વારા કામ ચાલુ રાખે છે. આજે આ કંપની દરરોજ ૧.૫ મિલિયનથી વધુ પાર્સલ પહોંચાડે છે. કંપનીના સહ-સ્થાપક વ્યાચેસ્લાવ ક્લિમોવે જણાવ્યું કે, "યુદ્ધના વર્ષોમાં અમારો વિકાસ ૨૦૧૦ના દાયકા કરતા પણ વધુ ઝડપી રહ્યો છે. અમે યુદ્ધમાં પ્રવેશ્યા ત્યારે માત્ર બે દેશોમાં હતા, આજે અમે યુરોપના ૧૬ દેશોમાં પહોંચી ગયા છીએ."
ભારે કિંમત ચૂકવી: ૨૪૯ સાથીઓ શહીદ
આ સફળતા પાછળ લોહી અને પરસેવો રહેલો છે. કંપનીએ અત્યાર સુધીમાં તેના ૨૪૯ કર્મચારીઓ ગુમાવ્યા છે, જેમાંથી ૨૨૭ કર્મચારીઓ લશ્કરમાં જોડા્યા બાદ રશિયા સામે લડતા શહીદ થયા હતા. આ ઉપરાંત, સેંકડો શાખાઓ અને કરોડોના પાર્સલ નાશ પામવા છતાં કંપનીએ હિંમત હારી નથી. ફ્રન્ટલાઈન શહેરો જેમ કે ખેરસન અને પોકરોવ્સ્કમાં જ્યારે અન્ય તમામ વ્યવસાયો બંધ થઈ ગયા હતા, ત્યારે નોવા પોસ્ટ સેવા આપનારી છેલ્લી કંપની હતી.
રેકોર્ડ તોડ નફો અને ભવિષ્યનું આયોજન
યુદ્ધ વચ્ચે પણ કંપનીનો આર્થિક પક્ષ મજબૂત રહ્યો છે. ૨૦૨૫ ના પ્રથમ નવ મહિનામાં કંપનીનો ચોખ્ખો નફો ૩૫% વધીને અંદાજે $૬૭ મિલિયન (૫૬૦ કરોડ રૂપિયાથી વધુ) થયો છે. કંપનીએ પોતાના ઓટોમેટેડ પાર્સલ મશીનોની સંખ્યા ૨૪,૦૦૦ થી વધારીને ૩૩,૦૦૦ કરી છે. નાતાલની સિઝનમાં લોકોના ચહેરા પર સ્મિત લાવવા માટે કંપનીએ ખાસ પરંપરાગત પેકેજિંગ પણ તૈયાર કર્યું છે.
આશાનું કિરણ: જ્યારે લોકો વાળ સુકવવા પોસ્ટ ઓફિસ આવે છે
નોવા પોસ્ટની શાખાઓ હવે માત્ર પાર્સલ માટે નથી રહી. જ્યારે શહેરમાં વીજળી નથી હોતી, ત્યારે ગ્રાહકો અહીં તેમના ફોન ચાર્જ કરવા કે ઇન્ટરનેટ વાપરવા માટે પણ આવે છે. કંપનીના મેનેજર ઇહોર શુટકોવ્સ્કી કહે છે કે, "અમારા માટે એ ગર્વની વાત છે કે મુશ્કેલ સમયમાં અમે દેશવાસીઓને એકબીજા સાથે જોડી રાખીએ છીએ." આ કંપની સાબિત કરે છે કે જો ઈચ્છાશક્તિ મજબૂત હોય તો બોમ્બમારો પણ વિકાસના રસ્તા રોકી શકતો નથી.