નવી દિલ્હી, તા. ૨૨ : દિલ્હી પોલીસની ક્રાઈમ બ્રાન્ચે લોકોના જીવન સાથે રમત રમતા નકલી દવાઓના માફિયાઓ વિરુદ્ધ મોટી સફળતા મેળવી છે. પોલીસે રામા રોડ પર કાર્યરત એક હાઈ-ટેક પ્રિન્ટિંગ યુનિટનો પર્દાફાશ કર્યો છે, જ્યાં અગ્રણી બ્રાન્ડ્સની નકલી દવાઓ અને કોસ્મેટિક્સ ઉત્પાદનો માટે હૂબહૂ પેકેજિંગ મટિરિયલ અને રેપર્સ તૈયાર કરવામાં આવતા હતા. આ મામલે પોલીસે અનિલ સિંહ રાવત અને રાહુલ અગ્રવાલ નામના બે મુખ્ય સૂત્રધારોની ધરપકડ કરી છે.
તપાસના તાર અગાઉ પકડાયેલા ગુનેગારો સાથે જોડાયા
ડેપ્યુટી કમિશનર ઓફ પોલીસ (ક્રાઈમ) આદિત્ય ગૌતમના જણાવ્યા અનુસાર, આ કાર્યવાહી નકલી દવાઓના વેચાણ અંગે ચાલી રહેલી વ્યાપક તપાસનો ભાગ છે. અગાઉ આ કેસમાં શ્રી રામ અને પરમોદ કુમાર ગુપ્તા જેવા આરોપીઓની ધરપકડ કરવામાં આવી હતી. તેમની પૂછપરછ દરમિયાન જાણવા મળ્યું હતું કે, આ નકલી દવાઓને બજારમાં અસલી તરીકે વેચવા માટે જરૂરી પેકેજિંગ બોક્સ અને મલમના રેપર્સ બુરારીના અનિલ સિંહના પ્રિન્ટિંગ પ્રેસમાં છપાતા હતા.
રેપર્સ જોઈને ડોક્ટરો પણ છેતરાઈ જાય તેવી આધુનિક પ્રિન્ટિંગ
પોલીસે જ્યારે રામા રોડ સ્થિત પ્રિન્ટિંગ પ્રેસ પર દરોડો પાડ્યો ત્યારે ત્યાંથી અનેક નામાંકિત મલમો અને દવાઓના બોક્સ છાપવા માટે વપરાતી કલર ફ્રેમ્સ અને ડાય મળી આવી હતી. આરોપી રાહુલ અગ્રવાલ શ્રી રામના કહેવા પર આ યુનિટમાં ઓર્ડર આપતો હતો. આ પેકેજિંગ એટલું સચોટ હતું કે સામાન્ય ગ્રાહક જ નહીં પણ નિષ્ણાતો માટે પણ અસલી અને નકલી વચ્ચેનો તફાવત પારખવો મુશ્કેલ હતો.
સ્વાસ્થ્ય માટે ગંભીર જોખમ
પોલીસનું માનવું છે કે આ નેટવર્ક દ્વારા સપ્લાય કરવામાં આવતી નકલી દવાઓ માત્ર દિલ્હી જ નહીં પણ અન્ય રાજ્યોના મેડિકલ સ્ટોર્સમાં પણ પહોંચી હોઈ શકે છે. નકલી દવાઓ અને કોસ્મેટિક્સના કારણે લોકોના સ્વાસ્થ્ય પર ગંભીર અસરો થવાનું જોખમ રહેલું છે. હાલમાં પોલીસ એ દિશામાં તપાસ કરી રહી છે કે આ પ્રિન્ટિંગ યુનિટ દ્વારા અન્ય કઈ કઈ દવાઓના નકલી બોક્સ છાપવામાં આવ્યા છે અને આ નેટવર્કમાં અન્ય કેટલા મોટા માથાઓ સામેલ છે.