નવી દિલ્હી: વર્ષ ૨૦૨૫ હવે વિદાય લેવાની તૈયારીમાં છે. આ વર્ષ ઈતિહાસના પાનાઓમાં એક એવી વાર્તા તરીકે લખાશે જેમાં શક્તિશાળી રાજકારણના પ્રહારો પણ હતા અને રમતગમતના મેદાનમાં વિજયનો ઉન્માદ પણ હતો. ૨૦૨૫ એ આપણને ટેરિફની ચિંતા આપી, તો બીજી તરફ મહિલા ક્રિકેટ ટીમના રૂપમાં ગૌરવની ક્ષણો પણ આપી. ચાલો જોઈએ એવા કયા શબ્દો અને ઘટનાઓ હતી જેણે આખા વર્ષ દરમિયાન હેડલાઈન્સમાં પ્રભુત્વ જમાવ્યું.
ડોનાલ્ડ ટ્રમ્પે અમેરિકાની સત્તા સંભાળતાની સાથે જ ભારત સાથેની 'મિત્રતા'ની કસોટી થઈ. પદ સંભાળ્યાના ગણતરીના કલાકોમાં જ ટ્રમ્પે ભારતીય માલ પર ૧૦% થી લઈને ૫૦% સુધીના 'ટેરિફ' (કર) લાદવાની જાહેરાત કરી દીધી. ખાસ કરીને રશિયા પાસેથી તેલ ખરીદવા બદલ ભારત પર લાદવામાં આવેલા આ પ્રતિબંધોએ ગુજરાત અને તમિલનાડુના લઘુ ઉદ્યોગોને મોટો ફટકો માર્યો. આ વર્ષે આપણને સમજાયું કે આંતરરાષ્ટ્રીય સંબંધોમાં મિત્રતા કરતાં સંતુલન વધુ જરૂરી છે.
વર્ષ ૨૦૨૫નું સૌથી હૃદયદ્રાવક દ્રશ્ય ૫ ફેબ્રુઆરીએ અમૃતસર એરપોર્ટ પર જોવા મળ્યું. અમેરિકાએ ગેરકાયદેસર ઈમિગ્રન્ટ્સ પર કરેલી કાર્યવાહીમાં સેંકડો ભારતીયોને પકડીને ખાસ વિમાન દ્વારા ભારત પરત મોકલ્યા. જ્યારે વિમાનના દરવાજા ખુલ્યા ત્યારે ભારતીયોના હાથમાં હાથકડી અને પગમાં બેડીઓ હતી. આ દ્રશ્ય માત્ર તૂટેલા સપનાઓનું જ નહીં, પણ ગેરકાયદે વિદેશ જવાની ઘેલછા સામે એક લપડાક સમાન હતું.
અંધકારભર્યા સમાચાર વચ્ચે ૨ નવેમ્બર ૨૦૨૫ની રાત્રે ભારતમાં દિવાળી જેવો માહોલ સર્જાયો. હરમનપ્રીત કૌરના નેતૃત્વમાં ભારતીય મહિલા ક્રિકેટ ટીમે દક્ષિણ આફ્રિકાને હરાવીને પ્રથમવાર વન-ડે વર્લ્ડ કપ જીતીને ઈતિહાસ રચ્યો. અમોલ મઝુમદારના કોચિંગ હેઠળ ટીમે સાબિત કરી દીધું કે ક્રિકેટ હવે માત્ર પુરુષોની રમત નથી રહી. આ જીતે ૨૦૧૭ની હારના જખમ પર મલમ લગાડવાનું કામ કર્યું.
આખું વર્ષ શેરી કૂતરાઓના હુમલાની ઘટનાઓથી ગાજતું રહ્યું. તમિલનાડુમાં ૫ લાખ જેટલા કૂતરા કરડવાના કેસો નોંધાયા અને મામલો સુપ્રીમ કોર્ટ સુધી પહોંચ્યો, જ્યાં કોર્ટે કૂતરાઓને આશ્રય આપવાનો આદેશ આપ્યો. બીજી તરફ, સાયબર ગુનેગારોએ 'ડિજિટલ અરેસ્ટ' નામના નવા હથિયારથી કરોડો રૂપિયાની લૂંટ ચલાવી. વીડિયો કોલ પર પોલીસ કે એજન્સીના અધિકારી બનીને નિર્દોષ લોકોને ડરાવીને તેમની જીવનભરની બચત લૂંટી લેવાના કિસ્સાઓએ ૨૦૨૫માં ટેકનોલોજીના દુરુપયોગનો ડર ફેલાવ્યો.
વર્ષ ૨૦૨૫ એ આપણને શીખવ્યું કે દુનિયા ગમે તેટલી ઝડપથી બદલાય, પણ સતર્કતા અને આત્મનિર્ભરતા જ આપણને બચાવી શકે છે.