મુંબઈ : માયાનગરી મુંબઈના ગ્રાન્ટ રોડ વિસ્તારમાં આવેલી જાણીતી ખાનગી હોસ્પિટલ 'ભાટિયા હોસ્પિટલ'માં આજે બપોરે આગ લાગવાની ઘટના બનતા ભારે અફરાતફરી મચી ગઈ હતી. હોસ્પિટલના મહત્વના ગણાતા CT-MRI સ્કેન યુનિટમાં અચાનક આગ ફાટી નીકળતા ધુમાડાના ગોટેગોટા ઉડવા લાગ્યા હતા. જોકે, હોસ્પિટલ સ્ટાફ અને ફાયર બ્રિગેડની સતર્કતાને કારણે મોટી જાનહાનિ ટળી છે.
બપોરના સમયે સર્જાયો ભયનો માહોલ
નાગરિક અધિકારીઓએ જણાવ્યું હતું કે, બપોરે આશરે ૧:૩૫ વાગ્યે હોસ્પિટલના ગ્રાઉન્ડ ફ્લોર પર આવેલા સ્કેનિંગ યુનિટમાં આગ લાગી હતી. પ્રાથમિક તપાસ મુજબ, આગ ઇલેક્ટ્રિકલ વાયરિંગ અને ઇન્સ્ટોલેશનમાં શોર્ટ સર્કિટને કારણે લાગી હોવાનું મનાય છે. જોતજોતામાં ધુમાડો હોસ્પિટલના અન્ય ભાગોમાં ફેલાવા લાગ્યો હતો, જેના કારણે દર્દીઓ અને તેમના સગામાં ભયનો માહોલ ફેલાયો હતો.
૨૫૦ લોકોનું સુરક્ષિત સ્થળાંતર
આગની ગંભીરતાને જોતા હોસ્પિટલ પ્રશાસને તાત્કાલિક 'કોડ રેડ' જાહેર કર્યો હતો. સાવચેતીના ભાગરૂપે હોસ્પિટલમાં સારવાર લઈ રહેલા દર્દીઓ, ફરજ પરના ડોક્ટરો અને નર્સિંગ સ્ટાફ સહિત અંદાજે ૨૫૦ લોકોને તાત્કાલિક હોસ્પિટલ પરિસરની બહાર સુરક્ષિત સ્થળે ખસેડવામાં આવ્યા હતા. ગંભીર હાલતમાં રહેલા દર્દીઓને અન્ય વોર્ડમાં શિફ્ટ કરવામાં આવ્યા હતા. સદનસીબે, આ સમગ્ર ઘટનામાં કોઈ પણ વ્યક્તિને ઈજા કે જાનહાનિ થઈ નથી.
ફાયર બ્રિગેડની સમયસરની કાર્યવાહી
ઘટનાની જાણ થતા જ મુંબઈ ફાયર બ્રિગેડની ગાડીઓ ઘટનાસ્થળે પહોંચી ગઈ હતી. ફાયર ફાઈટરોએ સતત પાણીનો મારો ચલાવીને બપોરે ૩ વાગ્યા સુધીમાં આગ પર સંપૂર્ણ કાબૂ મેળવી લીધો હતો. આગ ઓલવાયા બાદ કૂલિંગ ઓપરેશન હાથ ધરવામાં આવ્યું હતું. મુંબઈ મહાનગરપાલિકાના અધિકારીએ પુષ્ટિ કરી છે કે તમામ દર્દીઓ સુરક્ષિત છે અને સ્થિતિ હવે નિયંત્રણમાં છે. આગ લાગવાનું ચોક્કસ કારણ જાણવા માટે વિસ્તૃત તપાસ શરૂ કરવામાં આવી છે.