મુંબઈ : શહેરમાં વાયુ પ્રદૂષણને રોકવામાં અધિકારીઓની નિષ્ફળતા પર બોમ્બે હાઈકોર્ટે નારાજગી વ્યક્ત કરી છે. કોર્ટે બીએમસી કમિશનર ભૂષણ ગગરાણી અને પ્રદૂષણ નિયંત્રણ બોર્ડના સચિવને સુનાવણીમાં હાજર રહેવાનો નિર્દેશ આપ્યો છે.

   માહિતી અનુસાર, મુખ્ય ન્યાયાધીશ ચંદ્રશેખર અને ન્યાયાધીશ ગૌતમ અંકરની બેન્ચે વાયુ પ્રદૂષણ સંબંધિત સુઓ મોટો પીઆઈએલની સુનાવણી દરમિયાન બીએમસી કમિશનર ભૂષણ ગગરાણી અને પ્રદૂષણ નિયંત્રણ બોર્ડના સચિવને કોર્ટમાં વ્યક્તિગત રીતે હાજર રહેવાનો નિર્દેશ આપ્યો છે

   વાયુ પ્રદૂષણ પર કાર્યવાહી કરવામાં નિષ્ફળ રહેવા બદલ કોર્ટે અધિકારીઓને સમન્સ પાઠવ્યા હતા. બેન્ચે કહ્યું હતું કે, "અમે BMC કમિશનર અને MPCB સચિવને મંગળવારે કોર્ટમાં હાજર રહેવાનો આદેશ આપીએ છીએ. તેમણે પહેલા હાજર થવું જોઈએ." મુંબઈમાં બગડતી હવાની ગુણવત્તા અંગે હાઈકોર્ટમાં સુઓમોટો અરજી દાખલ કરવામાં આવી છે 

  અગાઉ, બોમ્બે હાઈકોર્ટે નાગરિકોને મુંબઈમાં બગડતી હવાની ગુણવત્તા અંગે જવાબદારીપૂર્વક વર્તવાની અપીલ કરી હતી અને પ્રદૂષણ સામે લડવા માટે નક્કર ઉકેલો શોધવાની જરૂરિયાત પર ભાર મૂક્યો હતો. આ દરમિયાન, બૃહન્મુંબઈ મ્યુનિસિપલ કોર્પોરેશન (BMC) એ શહેરના વધતા પ્રદૂષણને સંબોધવા માટે લેવામાં આવેલા વિવિધ પગલાંની વિગતો રજૂ કરી હતી.

   31 ઓક્ટોબર, 2023 ના રોજ, કોર્ટે વધતા પ્રદૂષણ પર સુઓમોટો નોંધ લીધી હતી અને બગડતી હવા ગુણવત્તા સૂચકાંક (AQI) પર ચિંતા વ્યક્ત કરી હતી. AQI કટોકટીને સંબોધવા માટે એક નિષ્ણાત સમિતિની રચના કરવામાં આવી હતી. એક મહિના પછી, હાઈકોર્ટે પર્યાવરણીય નિષ્ણાત, IIT નિષ્ણાત અને નિવૃત્ત મુખ્ય સચિવની બનેલી એક સમિતિની રચના કરી હતી. ત્યારથી, કોર્ટ પરિસ્થિતિ પર નજર રાખી રહી છે અને બૃહન્મુંબઈ મ્યુનિસિપલ કોર્પોરેશન અને મહારાષ્ટ્ર પ્રદૂષણ નિયંત્રણ બોર્ડ સહિત અધિકારીઓને AQI ને નિયંત્રણમાં રાખવા માટે વિવિધ નિર્દેશો જારી કર્યા છે.