આસામ : આસામના મુખ્યમંત્રી હિમંત બિસ્વા સરમાએ રાજ્યમાં વધી રહેલી ગેરકાયદે ઘૂસણખોરી અને ડેમોગ્રાફીમાં આવી રહેલા ફેરફાર અંગે અત્યંત ગંભીર અને વિવાદાસ્પદ નિવેદન આપ્યું છે. એક સત્તાવાર કાર્યક્રમ બાદ પત્રકારો સાથે વાતચીત કરતા તેમણે જણાવ્યું હતું કે, જો આસામમાં બાંગ્લાદેશી મૂળના લોકોની વસ્તીમાં વધુ ૧૦ ટકાનો વધારો થશે, તો આસામ આપોઆપ બાંગ્લાદેશમાં ભળી જશે.
વસ્તીના આંકડા પર મુખ્યમંત્રીનો દાવો
મુખ્યમંત્રી સરમાએ દાવો કર્યો હતો કે હાલ આસામની કુલ વસ્તીના ૪૦ ટકા લોકો બાંગ્લાદેશી મૂળના છે. તેમણે ઉમેર્યું કે, "હું છેલ્લા પાંચ વર્ષથી આ મુદ્દે બૂમો પાડી રહ્યો છું કારણ કે પરિસ્થિતિ નાજુક છે. જો આ સંખ્યા ૫૦ ટકા પર પહોંચશે, તો રાજ્યની ભૌગોલિક અને રાજકીય સ્થિતિ બદલાઈ જશે."
બાંગ્લાદેશી નેતાની ઉશ્કેરણીજનક ધમકીનો જવાબ
તાજેતરમાં બાંગ્લાદેશની નવી રચાયેલી 'નેશનલ સિટીઝન પાર્ટી' (NCP) ના નેતા હસનત અબ્દુલ્લાએ ભારત વિરોધી નિવેદન આપ્યું હતું. અબ્દુલ્લાએ કહ્યું હતું કે જો ભારત બાંગ્લાદેશને અસ્થિર કરવાનો પ્રયાસ કરશે, તો ઢાકાએ ભારતના ઉત્તર-પૂર્વના રાજ્યોને અલગ કરવા જોઈએ અને ત્યાંના અલગતાવાદી તત્વોને ટેકો આપવો જોઈએ. બાંગ્લાદેશી નેતાએ એમ પણ કહ્યું હતું કે 'ચિકન્સ નેક' તરીકે ઓળખાતો સિલીગુડી કોરિડોર ભૌગોલિક રીતે અત્યંત નબળો છે, જેના કારણે પૂર્વોત્તર ભારત બાકીના દેશથી કપાઈ શકે છે.
પાંચ વર્ષથી સતત ચેતવણી
હિમંત બિસ્વા સરમાએ પડોશી દેશના આ નિવેદન પર પ્રતિક્રિયા આપતા કહ્યું કે આ જ કારણ છે કે તેઓ સતત ઘૂસણખોરી સામે કડક પગલાં લેવાની હિમાયત કરી રહ્યા છે. તેમણે પૂર્વોત્તર રાજ્યોની સુરક્ષા અને અખંડિતતા જાળવવા માટે વસ્તી નિયંત્રણ અને ઘૂસણખોરી રોકવા પર ભાર મૂક્યો હતો.