નવી દિલ્હી: ભારતીય ઉડ્ડયન ક્ષેત્રે અત્યાર સુધી ઈન્ડિગો અને એર ઈન્ડિયા જેવી ગણતરીની કંપનીઓનું જ વર્ચસ્વ રહ્યું છે. જેના કારણે મુસાફરોને ઘણીવાર મોંઘી ટિકિટો અને મર્યાદિત વિકલ્પોનો સામનો કરવો પડે છે. પરંતુ હવે આ ચિત્ર બદલાવા જઈ રહ્યું છે. નાગરિક ઉડ્ડયન મંત્રાલયે ત્રણ નવી એરલાઇન્સ - શંખ એર, અલ હિન્દ એર અને ફ્લાય એક્સપ્રેસને ભારતમાં સેવા શરૂ કરવા માટે મંજૂરી (એનઓસી) આપી દીધી છે. આ નિર્ણયથી સ્પર્ધા વધશે અને મુસાફરોને ફાયદો થશે તેવી આશા છે.

ભારતીય ઉડ્ડયન ઉદ્યોગમાં છેલ્લા ઘણા સમયથી ‘ડ્યુઓપોલી’ એટલે કે માત્ર બે મોટી કંપનીઓના વર્ચસ્વની ચર્ચા ચાલી રહી હતી. એક તરફ ઈન્ડિગો અને બીજી તરફ ટાટા ગ્રુપની એરલાઇન્સ. આ મોનોપોલી તોડવા અને સામાન્ય મુસાફરોને વધુ વિકલ્પો આપવા માટે કેન્દ્ર સરકારે એક મોટું પગલું ભર્યું છે. નાગરિક ઉડ્ડયન મંત્રી રામ મોહન નાયડુએ જાહેરાત કરી છે કે મંત્રાલયે ત્રણ નવી એરલાઇન્સને કામગીરી શરૂ કરવા માટે ‘નો ઓબ્જેક્શન સર્ટિફિકેટ’ (એનઓસી) આપી દીધું છે.

૧. શંખ એર: આ ઉત્તર પ્રદેશની પ્રથમ શેડ્યુલ્ડ એરલાઇન બનવા જઈ રહી છે. કંપનીનું મુખ્ય મથક (હબ) લખનઉ અને નોઈડામાં હશે. શંખ એરનો ઉદ્દેશ્ય દેશના મોટા શહેરોને જોડવાની સાથે સાથે ઉત્તર પ્રદેશના એવા વિસ્તારોમાં પણ સેવા આપવાનો છે જ્યાં ફ્લાઈટની કનેક્ટિવિટી ઓછી છે. આ એરલાઇનને મંત્રાલય તરફથી અગાઉ એનઓસી મળી ચૂક્યું હતું, અને હવે તેઓ ઝડપથી ઉડાન ભરવાની તૈયારી કરી રહ્યા છે.

૨. અલ હિન્દ એર: કેરળ સ્થિત જાણીતા ટ્રાવેલ ગ્રુપ ‘અલ હિન્દ’ દ્વારા આ એરલાઇન શરૂ કરવામાં આવી રહી છે. અલ હિન્દ એર ખાસ કરીને દક્ષિણ ભારતમાં પ્રાદેશિક કનેક્ટિવિટી વધારવા પર ધ્યાન કેન્દ્રિત કરશે. શરૂઆતમાં તેઓ કોચીન, બેંગલુરુ, તિરુવનંતપુરમ અને ચેન્નાઈ જેવા શહેરો વચ્ચે સેવા શરૂ કરવાની યોજના ધરાવે છે. ભવિષ્યમાં આ કંપની આંતરરાષ્ટ્રીય ઉડાનો શરૂ કરવાની પણ નેમ ધરાવે છે.

૩. ફ્લાય એક્સપ્રેસ: આ યાદીમાં ત્રીજું નામ ફ્લાય એક્સપ્રેસનું છે. આ નવી એરલાઇનને પણ મંત્રાલયે લીલી ઝંડી આપી દીધી છે. નાગરિક ઉડ્ડયન મંત્રીએ હાલમાં જ આ ત્રણેય એરલાઇન્સની ટીમો સાથે મુલાકાત કરી હતી અને તેમને સરકાર તરફથી પૂર્ણ સહયોગની ખાતરી આપી હતી.

હાલમાં ભારતીય ડોમેસ્ટિક માર્કેટમાં ઈન્ડિગોનો હિસ્સો ૬૦ ટકાથી પણ વધુ છે. તાજેતરમાં ઈન્ડિગોની ફ્લાઈટ્સ રદ થવાને કારણે અને મોંઘા ભાડાંને કારણે મુસાફરોમાં નારાજગી જોવા મળી હતી. નિષ્ણાતોનું માનવું છે કે બજારમાં નવી કંપનીઓ આવવાથી સ્પર્ધા વધશે, જેના સીધા પરિણામ રૂપે હવાઈ ભાડાંમાં ઘટાડો થઈ શકે છે અને સર્વિસની ગુણવત્તા સુધરશે.

આ ત્રણેય કંપનીઓને મંત્રાલય તરફથી ‘એનઓસી’ મળી ગયું છે, જે પહેલું અને મહત્વનું પગલું છે. હવે તેમણે ડીજીસીએ (ડિરેક્ટોરેટ જનરલ ઓફ સિવિલ એવિએશન) પાસેથી લાઈસન્સ મેળવવાની પ્રક્રિયા પૂરી કરવી પડશે. આ પ્રક્રિયા પૂર્ણ થયા બાદ ટૂંક સમયમાં જ ભારતીય આકાશમાં આ નવા વિમાનો ઉડતા જોવા મળશે.

નાગરિક ઉડ્ડયન મંત્રી રામ મોહન નાયડુએ સોશિયલ મીડિયા પર જણાવ્યું હતું કે, "ભારત વિશ્વનું સૌથી ઝડપથી વિકસતું ઉડ્ડયન બજાર છે. અમે ઈચ્છીએ છીએ કે વધુને વધુ એરલાઇન્સ આવે જેથી મુસાફરોને વધુ સુવિધા મળે. ઉડાન યોજના હેઠળ અમે પ્રાદેશિક કનેક્ટિવિટી વધારવા માટે કટિબદ્ધ છીએ."