નવી દિલ્હી: ભારતના રાજકીય ક્ષેત્રે હાલમાં અમેરિકન રાષ્ટ્રપતિ ડોનાલ્ડ ટ્રમ્પ અને પાકિસ્તાની આર્મી ચીફ અસીમ મુનીર વચ્ચેની વધતી જતી મિત્રતાએ ખળભળાટ મચાવ્યો છે. કોંગ્રેસના વરિષ્ઠ નેતા જયરામ રમેશે મોદી સરકાર પર આકરા પ્રહારો કરતા સવાલ કર્યો છે કે જ્યારે અમેરિકા પાકિસ્તાનના જનરલ પર પ્રશંસાના પુષ્પો વેરતું હોય, ત્યારે ભારત સરકાર કેમ મૌન સેવી રહી છે? કોંગ્રેસે દાવો કર્યો છે કે જે જનરલ અસીમ મુનીરના ઝેરીલા નિવેદનોને કારણે એપ્રિલ 2025માં પહેલગામમાં લોહિયાળ આતંકવાદી હુમલો થયો હતો, તે જ વ્યક્તિને ટ્રમ્પ વ્હાઇટ હાઉસમાં લંચ માટે આમંત્રિત કરે અને "મહાન ફાઇટર" કહીને નવાજે તે ભારત માટે અત્યંત ચિંતાજનક બાબત છે.

કોંગ્રેસ દ્વારા રજૂ કરવામાં આવેલા આંકડાઓ મુજબ, છેલ્લા કેટલાક મહિનાઓમાં ટ્રમ્પ અને મુનીર વચ્ચે અનેક મુલાકાતો થઈ છે. 18 જૂન અને 1 ઓક્ટોબરના રોજ વ્હાઇટ હાઉસમાં યોજાયેલી બેઠકો બાદ ટ્રમ્પે મુનીરને "પ્રિય ફિલ્ડ માર્શલ" અને "અત્યંત આદરણીય જનરલ" જેવા બિરૂદ આપ્યા છે. જયરામ રમેશે ટ્વિટર (X) પર આક્ષેપ કર્યો હતો કે પાકિસ્તાનને આ પ્રકારે અમેરિકા તરફથી મળી રહેલી 'ક્લીનચીટ' ભારતની સુરક્ષા નીતિ પર મોટો પ્રશ્નાર્થ ચિહ્ન મૂકે છે. 26/11ના હુમલા બાદ પાકિસ્તાન વિશ્વ સ્તરે જે રીતે અલગ-થલગ પડી ગયું હતું, તેની સરખામણીમાં આજે તેને મળી રહેલો ગ્લોબલ સપોર્ટ ભારતની રાજદ્વારી નિષ્ફળતા હોવાનો દાવો પણ વિપક્ષે કર્યો છે.

આ સમગ્ર વિવાદમાં પહેલગામ હુમલાના પુરાવાઓ છતાં પાકિસ્તાનને મળી રહેલી છૂટછાટને કોંગ્રેસે રાષ્ટ્રીય ચિંતાનો વિષય ગણાવ્યો છે. કોંગ્રેસનું કહેવું છે કે એક તરફ ભારત સીમાપાર આતંકવાદને રોકવા માટે લડી રહ્યું છે, ત્યારે બીજી તરફ તેના સૌથી મજબૂત સાથી ગણાતા અમેરિકાનું આ વલણ આશ્ચર્યજનક છે. વિપક્ષે સરકારને ચેતવણી આપી છે કે જો આ મામલે યોગ્ય વૈશ્વિક દબાણ બનાવવામાં નહીં આવે, તો પાકિસ્તાની સેનાનું મનોબળ વધશે જે કાશ્મીરની શાંતિ માટે જોખમી સાબિત થઈ શકે છે. હવે જોવાનું એ રહેશે કે વિદેશ મંત્રાલય કોંગ્રેસના આ ધારદાર સવાલોનો શું જવાબ આપે છે.