ઢાકા: બાંગ્લાદેશના રાજકારણમાં અત્યારે સૌથી ચર્ચિત નામ છે – તારિક રહેમાન. પૂર્વ વડાપ્રધાન ખાલિદા ઝિયાના પુત્ર અને બાંગ્લાદેશ નેશનાલિસ્ટ પાર્ટી (BNP) ના કાર્યકારી અધ્યક્ષ તારિક રહેમાન આશરે ૧૭ વર્ષના લાંબા દેશવટા બાદ લંડનથી સ્વદેશ પરત ફરી રહ્યા છે. ફેબ્રુઆરી ૨૦૨૬માં યોજાનારી સામાન્ય ચૂંટણીઓ પહેલા તેમનું આ પુનરાગમન બાંગ્લાદેશની સત્તામાં મોટા પલટાનો સંકેત આપી રહ્યું છે.
૧૭ વર્ષનો વનવાસ અને કાયદાકીય જંગ
૨૦૦૮થી લંડનમાં આશરો લઈ રહેલા તારિક રહેમાન પર અનેક ભ્રષ્ટાચાર અને હિંસાના આરોપો હતા. શેખ હસીનાની સરકાર દરમિયાન તેમને ગેરહાજરીમાં જ આજીવન કેદની સજા ફટકારવામાં આવી હતી. જોકે, ઓગસ્ટ ૨૦૨૪માં વિદ્યાર્થી આંદોલનને કારણે શેખ હસીનાએ દેશ છોડવો પડ્યો અને ત્યારબાદ સ્થિતિ પલટાઈ. તાજેતરમાં બાંગ્લાદેશની કોર્ટે તેમને અનેક ગંભીર આરોપોમાંથી મુક્ત કર્યા છે, જે તેમના પરત આવવાનો માર્ગ મોકળો કરે છે.
BNP માટે 'સંજીવની' સમાન વાપસી
તારિક રહેમાન આવતીકાલે એટલે કે ૨૫ ડિસેમ્બરે ઢાકા પહોંચે તેવી શક્યતા છે. તેમની પાર્ટી BNP એ તેમના ભવ્ય સ્વાગત માટે જોરશોરથી તૈયારીઓ શરૂ કરી દીધી છે. એવું માનવામાં આવે છે કે લંડન બેઠા-બેઠા વર્ષો સુધી પાર્ટીનું સંચાલન કરનાર તારિક હવે જમીન પર ઉતરીને ચૂંટણી પ્રચારની કમાન સંભાળશે. પક્ષના કાર્યકરોમાં તેમને 'આગામી વડાપ્રધાન' તરીકે જોવામાં આવી રહ્યા છે.
નવા બાંગ્લાદેશનું નિર્માણ કે જૂની અસ્થિરતા?
બાંગ્લાદેશની વચગાળાની સરકારના મુખ્ય સલાહકાર મોહમ્મદ યુનુસે પહેલેથી જ ચૂંટણીની તારીખો જાહેર કરી દીધી છે. શેખ હસીનાની પાર્ટી 'અવામી લીગ' અત્યારે ચૂંટણી પ્રક્રિયાથી દૂર હોવાથી BNP અને જમાત-એ-ઈસ્લામી વચ્ચે સત્તાનો જંગ જામશે તેવું દેખાય છે. તારિક રહેમાન માટે મોટો પડકાર એ રહેશે કે તેઓ યુવા મતદારોને કેવી રીતે રીઝવે છે અને ભૂતકાળના વિવાદોને પાછળ છોડીને દેશને સ્થિરતા તરફ કેવી રીતે લઈ જાય છે.
બાંગ્લાદેશના આકાશમાં અત્યારે રાજકીય પારો ચરમસીમાએ છે. શું તારિક રહેમાનની વાપસી બાંગ્લાદેશમાં નવા યુગની શરૂઆત કરશે કે ફરી એકવાર સંઘર્ષના મંડાણ થશે, તેના પર આખા વિશ્વની નજર છે.