લખનૌ : ઉત્તર પ્રદેશ વિધાનસભાના શિયાળુ સત્રના છેલ્લા દિવસે મુખ્યમંત્રી યોગી આદિત્યનાથે વિપક્ષ પર આકરા પ્રહાર કરતા રાજ્યની કાયદો અને વ્યવસ્થા પર ગૌરવ વ્યક્ત કર્યું હતું. તેમણે સ્પષ્ટ શબ્દોમાં ચેતવણી આપી હતી કે યુપીમાં હવે ગુંડાઓનું રાજ નથી, પરંતુ કાયદાનું શાસન છે. તેમણે કહ્યું કે આજે રાજ્યમાં દરેક નાગરિક સુરક્ષિત છે, પણ દરેક ગુંડાના મનમાં ફાળ છે કે ગમે ત્યારે 'યમરાજ'નો ફોન આવી શકે છે.
બરેલીના મૌલાનાનો ઉલ્લેખ અને રમખાણો પર અંકુશ
પોતાના સંબોધનમાં સીએમ યોગીએ બરેલીના મૌલાનાનો ઉલ્લેખ કરતા કહ્યું કે, "રમખાણો કરનારાઓ સાથે કેવું વર્તન કરવામાં આવે છે, તે બરેલીના મૌલાનાને પૂછી જુઓ. આજે યુપીમાં ન તો કર્ફ્યુ છે, ન તો ક્યાંય રમખાણો થાય છે. બધું જ બરાબર છે." તેમણે ઉમેર્યું કે હવે પોલીસ આગળ અને ગુંડા પાછળ હોય તેવા દિવસો ગયા, હવે ગુનેગારોએ કાં તો રસ્તો સુધારવો પડશે અથવા પરિણામ ભોગવવા તૈયાર રહેવું પડશે.
સપા પર આકરા પ્રહાર: 'પીડીએ'ના નામે ન્યાયમાં ભેદભાવ
યોગી આદિત્યનાથે સમાજવાદી પાર્ટીને આડે હાથ લેતા કહ્યું કે માફિયાઓ સામે ઉભા રહેવાની હિંમત તેમનામાં નથી. પૂજા પાલનો ઉલ્લેખ કરતા તેમણે પૂછ્યું કે શું તે 'પીડીએ' (પછાત, દલિત, અલ્પસંખ્યક) નો ભાગ નહોતી? સપા સરકારે તેને ન્યાય કેમ ન અપાવ્યો? તેમણે ભારપૂર્વક કહ્યું કે દીકરી ગમે તે પક્ષ કે વર્ગની હોય, તેને ન્યાય અપાવવો એ અમારી સરકારની પ્રાથમિકતા છે.
ભ્રષ્ટાચાર અને પ્રોજેક્ટ લૂંટ પર ખુલાસો
માળખાગત સુવિધાઓના નામે અગાઉની સરકારમાં થયેલી લૂંટનો પર્દાફાશ કરતા સીએમએ કહ્યું કે, જેપીએનઆઈસી (JPNIC) જેવો પ્રોજેક્ટ ૮૬૦ કરોડ ખર્ચ્યા પછી પણ અધૂરો છે. પૂર્વાંચલ એક્સપ્રેસવે જેનું સિવિલ કામ ૧૫,૨૦૦ કરોડમાં અંદાજવામાં આવ્યું હતું, તે અમારી સરકારે માત્ર ૧૧,૪૦૦ કરોડમાં પૂર્ણ કરીને બતાવ્યું છે.
ગામડાઓ માટે ૨,૪૫૦ કરોડનું બજેટ
બીજી તરફ પંચાયતી રાજ મંત્રી ઓમ પ્રકાશ રાજભરે પૂરક બજેટ વિશે માહિતી આપતા જણાવ્યું કે ગામડાઓના વિકાસ માટે ૨,૪૫૦ કરોડ રૂપિયા ફાળવવામાં આવ્યા છે. જેમાં ૧૦૦ કરોડના ખર્ચે 'ઉત્સવ ભવન' બનાવવામાં આવશે, જેથી ગ્રામીણ જનતાને લગ્ન અને સામાજિક પ્રસંગો માટે સસ્તા દરે સુવિધા મળી રહે. સાથે જ ટેકનિકલ વિદ્યાર્થીઓ માટે 'સેન્ટર ઓફ એક્સેલન્સ' સ્થાપવાની પણ જાહેરાત કરવામાં આવી છે.