નવી દિલ્હી : દેશભરના લાખો વિદ્યાર્થીઓ જેની આતુરતાથી રાહ જોઈ રહ્યા હતા તે કોમન એડમિશન ટેસ્ટ (CAT) 2025નું પરિણામ આજે, ૨૪ ડિસેમ્બરના રોજ જાહેર કરી દેવામાં આવ્યું છે. ઈન્ડિયન ઈન્સ્ટિટ્યૂટ ઓફ મેનેજમેન્ટ (IIM), કોઝિકોડે દ્વારા સત્તાવાર વેબસાઈટ પર સ્કોરકાર્ડ લિંક લાઈવ કરી દેવામાં આવી છે. આ પરિણામ જાહેર થવાની સાથે જ હવે દેશની પ્રીમિયર મેનેજમેન્ટ સંસ્થાઓમાં પ્રવેશ મેળવવા માટેની સ્પર્ધાનો બીજો તબક્કો શરૂ થઈ ગયો છે.
૩૦ નવેમ્બરે ત્રણ સ્લોટમાં યોજાઈ હતી પરીક્ષા
ઉલ્લેખનીય છે કે, CAT 2025ની પરીક્ષા ૩૦ નવેમ્બરના રોજ દેશભરના વિવિધ કેન્દ્રો પર ત્રણ અલગ-અલગ સ્લોટમાં લેવામાં આવી હતી. આજના પરિણામમાં ઉમેદવારોના વિભાગ મુજબ સ્કેલ કરેલા સ્કોર્સ, કુલ સ્કોર અને તેના આધારે મળેલા પર્સન્ટાઇલની વિગતો આપવામાં આવી છે. આ પર્સન્ટાઇલ જ નક્કી કરશે કે કયા વિદ્યાર્થીને કઈ IIM અથવા અન્ય ટોપ MBA કોલેજમાંથી ઈન્ટરવ્યૂ માટે કોલ આવશે.
હવે પછીની પ્રક્રિયા: WAT અને PI નો જંગ
માત્ર CAT સ્કોરથી એડમિશન કન્ફર્મ થતું નથી. હવે દરેક IIM અને અન્ય મેનેજમેન્ટ કોલેજો પોતપોતાના કટઓફ જાહેર કરશે. જે વિદ્યાર્થીઓ આ કટઓફ ક્લિયર કરશે તેમને લેખિત ક્ષમતા કસોટી (WAT), જૂથ ચર્ચા (GD) અને વ્યક્તિગત ઇન્ટરવ્યૂ (PI) માટે બોલાવવામાં આવશે. એકેડેમિક રેકોર્ડ અને વર્ક એક્સપિરિયન્સના આધારે આખરી મેરિટ લિસ્ટ તૈયાર થશે.
તમારું સ્કોરકાર્ડ આ રીતે તપાસો:
૧. સત્તાવાર વેબસાઇટ iimcat.ac.in પર જાઓ.
૨. હોમ પેજ પર 'CAT 2025 Scorecard Download' લિંક શોધો.
૩. તમારા રજિસ્ટર્ડ યુઝર આઈડી અને પાસવર્ડ વડે લોગિન કરો.
૪. તમારું સ્કોરકાર્ડ સ્ક્રીન પર દેખાશે, તેને ડાઉનલોડ કરી પ્રિન્ટ આઉટ લઈ લો.
નવી દિલ્હીથી મળતા અહેવાલો મુજબ, આ વર્ષે પણ સ્પર્ધા ખૂબ જ કપરી રહી છે અને ઘણા વિદ્યાર્થીઓએ ૯૯ થી વધુ પર્સન્ટાઇલ મેળવ્યા હોવાનું અનુમાન છે.