નવી દિલ્હી: દેશની રાજધાની દિલ્હીમાં મેટ્રો નેટવર્કને વધુ મજબૂત બનાવવા માટે કેન્દ્રીય કેબિનેટની બેઠકમાં એક મોટો નિર્ણય લેવામાં આવ્યો છે. કેન્દ્રીય મંત્રી અશ્વિની વૈષ્ણવે જાહેરાત કરી છે કે દિલ્હી મેટ્રોના ફેઝ-5A વિસ્તરણને મંજૂરી આપી દેવામાં આવી છે. આ પ્રોજેક્ટ હેઠળ કુલ ₹12,015 કરોડના રોકાણ સાથે દિલ્હીના ખૂણેખૂણે મેટ્રોની પહોંચ વધારવામાં આવશે, જેનાથી રોજના લાખો મુસાફરોનો સમય અને ઈંધણ બચશે.
ત્રણ નવા કોરિડોર અને 13 નવા સ્ટેશન: આ નવા વિસ્તરણમાં કુલ 16.07 કિલોમીટર લાંબી લાઇન ઉમેરવામાં આવશે, જેમાં 13 નવા સ્ટેશનોનો સમાવેશ થાય છે. ખાસ વાત એ છે કે આ 13 સ્ટેશનોમાંથી 10 સ્ટેશનો ભૂગર્ભ (Underground) હશે અને 3 એલિવેટેડ હશે. આ પ્રોજેક્ટમાં મુખ્યત્વે ત્રણ કોરિડોરને પ્રાધાન્ય આપવામાં આવ્યું છે:
1. આર.કે. આશ્રમ માર્ગથી ઇન્દ્રપ્રસ્થ: આ લાઈન સેન્ટ્રલ દિલ્હી, કર્તવ્ય ભવન અને ઇન્ડિયા ગેટને સીધી કનેક્ટિવિટી આપશે.
2. એરોસિટીથી આઈજીઆઈ એરપોર્ટ (ટર્મિનલ-1): દક્ષિણ દિલ્હીના લોકોને ડોમેસ્ટિક એરપોર્ટ સુધી પહોંચવામાં હવે ટ્રાફિકની ચિંતા નહીં રહે.
3. તુગલકાબાદથી કાલિંદી કુંજ: સાકેત, છતરપુર અને કાલિંદી કુંજ જેવા વિસ્તારોને આ સીધું એરપોર્ટ સાથે જોડશે.
લાખો કર્મચારીઓ અને મુસાફરોને બખ્ખાં: દિલ્હી મેટ્રોમાં હાલમાં દરરોજ સરેરાશ 65 લાખ લોકો મુસાફરી કરે છે, જે આંકડો ઓગસ્ટ 2025માં 81 લાખને પાર કરી ગયો હતો. નવા કોરિડોર શરૂ થવાથી મેટ્રોમાં થતી ભીડમાં ઘટાડો થશે. ખાસ કરીને મધ્ય દિલ્હીમાં કામ કરતા 60,000 થી વધુ સરકારી કર્મચારીઓને આ વિસ્તરણથી સીધો ફાયદો થશે. મેટ્રો લાઇનનું કુલ નેટવર્ક હવે 400 કિલોમીટરથી પણ વધુ લાંબુ થઈ જશે, જે તેને વિશ્વના શ્રેષ્ઠ પરિવહન નેટવર્કની હરોળમાં મૂકશે.
પ્રદૂષણ મુક્ત દિલ્હી તરફ એક કદમ: આગામી ત્રણ વર્ષમાં આ પ્રોજેક્ટ પૂર્ણ થવાની અપેક્ષા છે. કેન્દ્ર સરકાર, દિલ્હી સરકાર અને આંતરરાષ્ટ્રીય એજન્સીઓના સંયુક્ત ભંડોળથી આ કામગીરી કરવામાં આવશે. મેટ્રોના વિસ્તરણને કારણે રસ્તાઓ પર ખાનગી વાહનોની સંખ્યા ઘટશે, જેના પરિણામે વાયુ પ્રદૂષણમાં મોટો ઘટાડો જોવા મળશે. દિલ્હીના પશ્ચિમ, ઉત્તર અને જૂની દિલ્હીના વિસ્તારોને દક્ષિણ દિલ્હી સાથે જોડવાથી સામાન્ય માણસનું જીવન ઘણું સરળ બની જશે.