નવી દિલ્હી:  ભારત અને યુરોપ વચ્ચેના આર્થિક અને સાંસ્કૃતિક સંબંધોને નવી ઊંચાઈએ લઈ જવા માટે ટાટા ગ્રુપની માલિકીની એર ઇન્ડિયા અને બજેટ એરલાઇન ઇન્ડિગોએ કમર કસી લીધી છે. લાંબા સમયની રાહ જોયા બાદ, એર ઇન્ડિયાએ ઈટાલીની રાજધાની રોમ માટે સીધી ફ્લાઇટ સેવાઓ ફરી શરૂ કરવાની જાહેરાત કરી છે. 25 માર્ચ, 2026 થી શરૂ થનારી આ સેવા દ્વારા મુસાફરો દિલ્હીથી સીધા જ રોમના લિયોનાર્ડો દા વિન્સી એરપોર્ટ પહોંચી શકશે. કોવિડ-19 મહામારીને કારણે વર્ષ 2020 માં સ્થગિત કરવામાં આવેલી આ સેવા હવે અદ્યતન બોઇંગ 787-8 ડ્રીમલાઇનર વિમાન દ્વારા ઓપરેટ કરવામાં આવશે, જે મુસાફરોને આરામદાયક અને નોન-સ્ટોપ મુસાફરીનો અનુભવ કરાવશે.

એર ઇન્ડિયાની આ નવી ફ્લાઇટ અઠવાડિયામાં ચાર દિવસ—સોમવાર, બુધવાર, શુક્રવાર અને રવિવારે ઉડાન ભરશે, જેમાં બિઝનેસ અને ઇકોનોમી એમ બંને ક્લાસની સુવિધા ઉપલબ્ધ હશે. એર ઇન્ડિયાના ચીફ કોમર્શિયલ ઓફિસર નિપુણ અગ્રવાલે જણાવ્યું હતું કે, રોમ એ યુરોપમાં અમારું આઠમું અને અત્યંત વ્યૂહાત્મક સ્થળ છે, જે ભારત અને ઈટાલી વચ્ચેના વેપાર અને પર્યટનને વેગ આપશે. બીજી તરફ, રોમ એરપોર્ટના અધિકારીઓએ પણ આ વધતી માંગને આવકારી છે અને માને છે કે આ કનેક્ટિવિટીથી દક્ષિણપૂર્વ એશિયાના મુસાફરો માટે પણ દિલ્હી થઈને ઈટાલી પહોંચવું અત્યંત સરળ બની જશે.

યુરોપના આકાશમાં કબજો જમાવવા માટે ઇન્ડિગો પણ પાછળ નથી. ઇન્ડિગોએ આગામી 2 ફેબ્રુઆરીથી દિલ્હી અને લંડન હીથ્રો વચ્ચે અઠવાડિયામાં પાંચ સીધી ફ્લાઇટ્સ શરૂ કરવાની જાહેરાત કરી છે. મુંબઈ-લંડન રૂટની સફળતા બાદ ઇન્ડિગો હવે દિલ્હીથી પણ પોતાની સેવાઓ વિસ્તારવા જઈ રહી છે. બોઇંગ 787 એરક્રાફ્ટ દ્વારા સંચાલિત આ ફ્લાઇટ્સમાં ઇન્ડિગો તેના ખાસ 'સ્ટ્રેચ' અને ઇકોનોમી ક્લાસની સુવિધા આપશે. ઇન્ડિગોના સીઈઓ પીટર એલ્બર્સે જણાવ્યું કે, આંતરરાષ્ટ્રીય મુસાફરીને વધુ સુલભ બનાવવાની અમારી પ્રતિબદ્ધતા હેઠળ લંડન હીથ્રો એ સૌથી મહત્વપૂર્ણ પડાવ છે, જે વેપારીઓ અને પ્રવાસીઓ બંને માટે આશીર્વાદરૂપ સાબિત થશે.