રાજકોટ: દરેક ભારતીય રસોડામાં પ્રેશર કૂકર એક અનિવાર્ય હિસ્સો છે. સામાન્ય રીતે આપણે તેનો ઉપયોગ દાળ બાફવા, ભાત બનાવવા કે બટાકા ઉકાળવા માટે જ કરીએ છીએ. પરંતુ શું તમે જાણો છો કે તમારું સાદું કૂકર એક તંદૂર, ઓવન અને દહીં જમાવવાનું મશીન પણ બની શકે છે? પ્રખ્યાત માસ્ટર શેફ પંકજ ભદોરિયાએ સોશિયલ મીડિયા પર કૂકરના પાંચ એવા અનોખા ઉપયોગો શેર કર્યા છે જે જાણીને તમે પણ ચોંકી જશો.
૧. કૂકર હવે બનશે 'દેશી તંદૂર'
જો તમારે ઘરે હોટલ જેવી તંદૂરી રોટલી, નાન કે કુલચા ખાવા હોય તો મોંઘા તંદૂરની જરૂર નથી. શેફ પંકજ જણાવે છે કે કૂકરને ઊંધું કરીને ગેસ પર ગરમ કરો. નાન કે રોટલી વણીને તેની એક બાજુ પાણી લગાવી કૂકરની અંદરની દીવાલ પર ચોંટાડી દો. ત્યારબાદ કૂકરને ઊંધું રાખીને શેકો. તૈયાર છે ગરમાગરમ તંદૂરી નાન!
૨. ઓવનની જરૂર નથી, કૂકરમાં જ બનાવો કેક
ક્રિસમસ અને નવા વર્ષ પર જો તમારે કેક કે બિસ્કિટ બેક કરવા હોય તો કૂકર એક ઉત્તમ ઓવન સાબિત થઈ શકે છે. મીઠું કે સ્ટેન્ડ મૂકીને કૂકરને પ્રી-હીટ કરો અને તેમાં કેકનું બેટર મૂકી સીટી કાઢીને ધીમા તાપે પકવો. તમારી સોફ્ટ કેક મિનિટોમાં તૈયાર થઈ જશે.
૩. શિયાળામાં દહીં જમાવવાની પરફેક્ટ ટ્રીક
શિયાળામાં દહીં જમાવવું એક મોટો પડકાર હોય છે. આ માટે હુંફાળા દૂધમાં મેળવણ નાખી તેને ડબ્બામાં ભરો. હવે કૂકરને થોડું ગરમ કરી ગેસ બંધ કરી દો. કૂકરની અંદર કિચન ટુવાલ લપેટીને દહીંનો ડબ્બો મૂકી દો. કૂકરની ગરમીને કારણે દહીં એકદમ ઘટ્ટ જામશે.
૪. ઘરનું પોપકોર્ન મશીન
થિયેટર જેવા ક્રન્ચી પોપકોર્ન બનાવવા માટે કૂકરમાં થોડું તેલ, હળદર, મીઠું અને મકાઈના દાણા નાખો. કૂકરનું ઢાંકણ (સીટી કાઢીને) બંધ કરી ૩ મિનિટ હાઈ ફ્લેમ પર રાખો. ઘરે જ તાજા પોપકોર્ન તૈયાર થઈ જશે.
૫. લિટ્ટી અને બાટી માટે બેસ્ટ વિકલ્પ
પરંપરાગત રીતે લિટ્ટી કે બાટી અંગારા પર બનાવવામાં આવે છે, પણ શહેરોમાં તે શક્ય નથી. શેફ પંકજ મુજબ, કૂકરને ગરમ કરી તેમાં બાટી મૂકી ઢાંકી દો. ૧૦ થી ૧૫ મિનિટમાં કૂકર એક 'ચૂલા' તરીકે કામ કરશે અને તમને ગામડા જેવો જ સ્વાદ મળશે.
ખાસ ટિપ: કૂકર બહાર દાળનું પાણી નીકળે તો શું કરવું?
ઘણીવાર દાળ રાંધતી વખતે સીટી વાગે ત્યારે પાણી બહાર નીકળી કૂકર અને ગેસ ગંદા કરે છે. આ માટે શેફ પંકજ એક સરળ હેક જણાવે છે: દાળની સાથે કૂકરમાં એક નાની સ્ટીલની વાટકી મૂકી દો. આનાથી દાળ ઉકળતી વખતે પાણી સીટી વાટે બહાર નહીં આવે.