દુબઈ : યુનાઈટેડ આરબ અમીરાત (UAE) માં નોકરી કરતા લાખો કામદારો માટે એક મહત્વના સમાચાર સામે આવ્યા છે. સામાન્ય રીતે કર્મચારીના ઘરથી ઓફિસ સુધી પહોંચવાના સમયને કામના કલાકો (Working Hours) માં ગણવામાં આવતો નથી, પરંતુ માનવ સંસાધન અને અમીરાત મંત્રાલયે (MoHRE) હવે એવી ત્રણ ચોક્કસ પરિસ્થિતિઓની જાહેરાત કરી છે જેમાં મુસાફરીમાં વિતેલો સમય પણ તમારી ડ્યુટીનો ભાગ ગણાશે.
આ ૩ સ્થિતિમાં મળશે 'ઓન ડ્યુટી'નો લાભ
મંત્રાલયના જણાવ્યા અનુસાર, નીચે મુજબના કિસ્સામાં મુસાફરીના સમયને કામના કલાક તરીકે ગણવામાં આવશે:
૧. ખરાબ હવામાન: જ્યારે રાષ્ટ્રીય હવામાનશાસ્ત્ર કેન્દ્ર દ્વારા સત્તાવાર ચેતવણી જારી કરવામાં આવી હોય અને કર્મચારી કંપની દ્વારા પૂરા પાડવામાં આવેલ વાહનમાં મુસાફરી કરતો હોય.
૨. અકસ્માત કે બ્રેકડાઉન: જો કંપનીના વાહનમાં ઓફિસ જતી વખતે રસ્તામાં અકસ્માત થાય અથવા વાહન બગડી જવાને કારણે વિલંબ થાય, તો તે સમય કામના કલાકોમાં ગણાશે.
૩. સ્પષ્ટ કરાર: જો એમ્પ્લોયર અને કર્મચારી વચ્ચેના જોબ કોન્ટ્રાક્ટમાં અગાઉથી જ નક્કી કરવામાં આવ્યું હોય કે મુસાફરીનો સમય કામના કલાકોમાં સામેલ રહેશે.
ઓવરટાઇમ અને સુરક્ષાના નિયમો
મંત્રાલયે ખાનગી કંપનીઓને આદેશ આપ્યો છે કે ખરાબ હવામાન દરમિયાન કામદારોની સુરક્ષા માટે તમામ જરૂરી પગલાં લેવામાં આવે. નિયમ મુજબ, કંપની કર્મચારી પાસે રોજના વધુમાં વધુ ૨ કલાકનો ઓવરટાઇમ કરાવી શકે છે. જોકે, કોઈ કટોકટી કે મોટા નુકસાનને રોકવા માટે અપવાદરૂપ કિસ્સામાં વધુ સમય કામ કરાવી શકાય છે, પરંતુ કોઈપણ ૩ અઠવાડિયાના ગાળામાં કુલ કામના કલાકો ૧૪૪ થી વધુ ન હોવા જોઈએ.
ઓનલાઈન ટ્રાન્સફર પ્રક્રિયા થઈ સરળ
આ સાથે જ મંત્રાલયે 'તાશીલ' (Tasheel) સિસ્ટમ દ્વારા એક કંપનીમાંથી બીજી કંપનીમાં ટ્રાન્સફર લેવાની ઓનલાઈન પ્રક્રિયા વિશે પણ માહિતી આપી છે. હવે કર્મચારીઓ ઓનલાઈન અરજી કરીને, પાસપોર્ટ અને અન્ય દસ્તાવેજો અપલોડ કરી ડિજિટલ સહી દ્વારા સરળતાથી ટ્રાન્સફર પ્રક્રિયા પૂર્ણ કરી શકે છે. આ માટે પાસપોર્ટની માન્યતા ઓછામાં ઓછી ૬ મહિનાની હોવી અનિવાર્ય છે.
UAE સરકારના આ નિર્ણયથી ખાસ કરીને ટ્રાન્સપોર્ટ અને કન્સ્ટ્રક્શન ક્ષેત્રમાં કામ કરતા હજારો કર્મચારીઓને કાયદાકીય રક્ષણ અને માનસિક શાંતિ મળશે.