લખનૌ, તા. 25 : ઉત્તર પ્રદેશમાં શિયાળાની શરૂઆત સાથે જ ધુમ્મસની ચાદર છવાઈ ગઈ છે, જેના કારણે માર્ગ અકસ્માતોનું જોખમ વધી જાય છે. આ પરિસ્થિતિને ધ્યાનમાં રાખીને મુખ્યમંત્રી યોગી આદિત્યનાથે બસ મુસાફરોની સુરક્ષા માટે અત્યંત કડક માર્ગદર્શિકા જારી કરી છે. હવે ઉત્તર પ્રદેશની સરકારી અને કોન્ટ્રાક્ટ પર ચાલતી બસો માટે નવા નિયમો લાગુ કરી દેવામાં આવ્યા છે, જેનો ભંગ કરનાર સામે કડક કાર્યવાહી કરવામાં આવશે.
નવી ગાઈડલાઈન મુજબ, ધુમ્મસ અને ઓછી દૃશ્યતા (Visibility) દરમિયાન બસની મહત્તમ ઝડપ 40 કિમી પ્રતિ કલાક જ રાખવાની સૂચના અપાઈ છે. જો ધુમ્મસ અતિશય વધી જાય, તો ડ્રાઈવરોએ બસને કોઈ સલામત સ્થળે ઉભી રાખી દેવી પડશે અને દૃશ્યતા સામાન્ય થયા બાદ જ મુસાફરી આગળ વધારવાની રહેશે. આ ઉપરાંત, બસ સ્ટોપ પર લાઉડસ્પીકર દ્વારા મુસાફરોને સુરક્ષા અંગે સતત માહિતગાર કરવામાં આવશે.
ડ્રાઈવરો માટે 'બ્રેથલાઈઝર ટેસ્ટ' ફરજિયાત
મુસાફરોની જિંદગી સાથે રમત ન થાય તે માટે યોગી સરકારે ડ્રાઈવરો પર કડક નજર રાખવાનો આદેશ આપ્યો છે. હવે હાઈવે પર તૈનાત ઇન્ટરસેપ્ટર્સ અને એન્ફોર્સમેન્ટ વાહનો દ્વારા ડ્રાઈવરોનો ગમે ત્યારે આલ્કોહોલ ટેસ્ટ લેવામાં આવશે. દારૂ પીને વાહન ચલાવતા ડ્રાઈવરો સામે ત્વરિત કડક પગલાં લેવાશે. વધુમાં, લાંબા અંતરની અને રાત્રિ સેવાઓ માટે માત્ર એવા જ ડ્રાઈવરોને તૈનાત કરવામાં આવશે જેમનો રેકોર્ડ અકસ્માત મુક્ત હોય અને જેમને ઓછામાં ઓછો 8 કલાકનો આરામ મળ્યો હોય.
પરિવહન મંત્રી દયાશંકર સિંહે સ્પષ્ટ કર્યું છે કે બસોમાં ફોગ લાઈટ્સ, ઓલ-વેધર બલ્બ અને રિફ્લેક્ટિવ ટેપ જેવી સુવિધાઓ હોવી અનિવાર્ય છે. એક્સપ્રેસ-વે પર અચાનક બ્રેક મારવા કે સ્ટોપેજ કરવા પર પણ પ્રતિબંધ મુકાયો છે. સરકારની આ કડક પહેલનો મુખ્ય ઉદ્દેશ્ય શૂન્ય અકસ્માત (Zero Accident) ના લક્ષ્યાંકને પ્રાપ્ત કરવાનો અને મુસાફરોને સુરક્ષિત તેમના ગંતવ્ય સ્થાન સુધી પહોંચાડવાનો છે.