ઢાકા: બાંગ્લાદેશના રાજકારણમાં એક નવો અને વિવાદાસ્પદ વળાંક આવ્યો છે, કારણ કે મુહમ્મદ યુનુસની વચગાળાની સરકારે શેખ હસીનાની અવામી લીગને ફેબ્રુઆરી ૨૦૨૬માં યોજાનારી સંસદીય ચૂંટણીઓમાંથી સંપૂર્ણપણે બહાર કરી દીધી છે. સરકારના પ્રેસ સચિવ શફીકુલ આલમે સ્પષ્ટ શબ્દોમાં જાહેર કર્યું છે કે આતંકવાદ વિરોધી વટહુકમ હેઠળ અવામી લીગની નોંધણી રદ કરવામાં આવી છે અને તેની કોઈપણ રાજકીય પ્રવૃત્તિ સહન કરવામાં આવશે નહીં. જુલાઈ ૨૦૨૪ના લોહિયાળ વિદ્યાર્થી આંદોલન બાદ સત્તા ગુમાવનાર હસીનાની પાર્ટી હવે કાયદાકીય કુંડાળામાં ફસાઈ છે, જ્યાં ઇન્ટરનેશનલ ક્રાઇમ ટ્રિબ્યુનલના કેસ પૂરા ન થાય ત્યાં સુધી આ પ્રતિબંધ યથાવત રહેશે, જે બાંગ્લાદેશના ઈતિહાસમાં એક અભૂતપૂર્વ રાજકીય શૂન્યાવકાશ પેદા કરી રહ્યો છે.

આ નિર્ણય સામે વિદેશમાં રહેલી શેખ હસીનાએ તીખી પ્રતિક્રિયા આપતા તેને લોકશાહીની હત્યા ગણાવી છે. તેમણે સવાલ ઉઠાવ્યો છે કે જે પક્ષ નવ વખત જનતાના મતોથી ચૂંટાયો હોય, તેને મતદાનના અધિકારથી વંચિત રાખીને આ વચગાળાની સરકાર કયા પ્રકારની 'નૈતિક કાયદેસરતા' સ્થાપિત કરવા માંગે છે? હસીનાએ ચેતવણી આપી છે કે અવામી લીગ વિનાની ચૂંટણી એ લોકશાહી પ્રક્રિયા નહીં પરંતુ માત્ર એક પક્ષપાતી 'રાજ્યાભિષેક' બનીને રહી જશે. ઇતિહાસ સાક્ષી છે કે જ્યારે બાંગ્લાદેશની જનતાના મનપસંદ પક્ષને મેદાનમાંથી હટાવવામાં આવે છે, ત્યારે જનતા મતદાન મથકોથી દુર રહે છે, જે દેશમાં રાષ્ટ્રીય સમાધાનના બદલે વધુ અરાજકતા ફેલાવી શકે છે.

હાલમાં બાંગ્લાદેશી રાજકારણમાં BNP અને જમાત-એ-ઇસ્લામી જેવા પક્ષોનો પ્રભાવ વધી રહ્યો છે, પરંતુ અવામી લીગ જેવી જૂની અને લોકપ્રિય પાર્ટીના બહિષ્કારથી આંતરરાષ્ટ્રીય સ્તરે પણ પ્રશ્નો ઉઠી રહ્યા છે. વચગાળાની સરકારના આ આકરા પગલાથી લાખો સમર્થકોમાં રોષ છે, જે ભવિષ્યમાં મોટા જન-આંદોલનનું સ્વરૂપ લઈ શકે છે. શું બાંગ્લાદેશ ખરેખર ન્યાયી ચૂંટણી તરફ આગળ વધી રહ્યું છે કે પછી આ માત્ર એક બદલાની રાજનીતિ છે? તે આવનારો સમય જ બતાવશે, પરંતુ અત્યારે તો ઢાકાની ગલીઓથી લઈને દિલ્હીના રાજદ્વારી ગલિયારાઓ સુધી આ નિર્ણયની ગંભીર અસરો વર્તાઈ રહી છે.