ઇસ્લામાબાદ: પાકિસ્તાન અત્યારે માત્ર આર્થિક સંકટ સામે જ નહીં, પરંતુ રસ્તાઓ પર વહેતા લોહી સામે પણ લડી રહ્યું છે. ૨૦૨૫ના તાજા આંકડા મુજબ, પાકિસ્તાનના પંજાબ પ્રાંતમાં માર્ગ અકસ્માતોએ એક ભયાનક માનવતાવાદી કટોકટીનું સ્વરૂપ ધારણ કર્યું છે. રેસ્ક્યુ ૧૧૨૨ ના રિપોર્ટ અનુસાર, આ વર્ષે અંદાજે ૪,૮૦૦ લોકોએ રસ્તા પર દમ તોડ્યો છે, જે ગત વર્ષની સરખામણીએ ૧૯ ટકા વધુ છે. ચોંકાવનારી વાત એ છે કે અકસ્માતોની સંખ્યામાં જે વધારો થયો છે તેના કરતા મોતના આંકડામાં થયેલો ઉછાળો વધુ તીવ્ર છે. આનો અર્થ એ છે કે હવે પાકિસ્તાનના રસ્તાઓ પર થતી ટક્કર પહેલા કરતા વધુ જીવલેણ અને ક્રૂર બની ગઈ છે, જેમાં નિર્દોષ નાગરિકો પળવારમાં કાળના ખપ્પરમાં હોમાઈ રહ્યા છે.

આ ભયાનક આંકડાઓમાં સૌથી વધુ ભોગ મોટરસાયકલ સવારોનો લેવાયો છે. કુલ અકસ્માતોમાંથી ૭૫ ટકા કિસ્સાઓમાં બાઇક સવારો સામેલ હતા. નિષ્ણાતોના મતે, જો મોટરસાયકલની ઝડપ ૫૦ કિમી પ્રતિ કલાકથી વધે છે, તો દરેક વધારાના ૧ કિમી સાથે મોતના જોખમમાં ૫ ટકાનો વધારો થાય છે. પંજાબ ઇમરજન્સી સર્વિસીસના સેક્રેટરી ડૉ. રિઝવાન નસીરે આ સ્થિતિને અત્યંત ગંભીર ગણાવતા કહ્યું કે મોટાભાગના મૃત્યુ પામનારા લોકો પરિવારના એકમાત્ર કમાનાર સભ્યો હતા, જેના કારણે હજારો પરિવારો પાયમાલ થઈ ગયા છે. લાહોર ૮૮,૭૪૩ અકસ્માતો સાથે પાકિસ્તાનની 'અકસ્માત રાજધાની' તરીકે ઉભરી આવ્યું છે, જ્યારે ફૈસલાબાદ અને મુલતાન પણ આ યાદીમાં મોખરે છે.

અકસ્માતમાં બચી ગયેલા લોકોની હાલત પણ અત્યંત દયનીય છે. અંદાજે ૫.૭ લાખ લોકો ઘાયલ થયા છે, જેમાંથી હજારો લોકો માથાની ગંભીર ઈજાઓ, કરોડરજ્જુની સમસ્યાઓ અથવા કાયમી વિકલાંગતાનો ભોગ બન્યા છે. આંકડા દર્શાવે છે કે અકસ્માતનો ભોગ બનનારાઓમાં ૮૦ ટકા પુરુષો છે. ટ્રાફિક નિયમોનો અભાવ, ઓવરસ્પીડિંગ અને જર્જરિત રસ્તાઓ પાકિસ્તાન માટે 'મોતનું જાળ' બની ગયા છે. નિષ્ણાતો ચેતવણી આપી રહ્યા છે કે જો હજુ પણ પાકિસ્તાન સરકાર કડક ટ્રાફિક કાયદા અને રોડ સેફ્ટી અંગે જાગૃતિ નહીં લાવે, તો આગામી વર્ષોમાં આ રસ્તાઓ સ્મશાનમાં ફેરવાતા વાર નહીં લાગે.