મનાલી : હિમાચલ પ્રદેશનું વિશ્વ વિખ્યાત પર્યટન સ્થળ મનાલી હાલમાં પ્રવાસીઓના સૈલાબથી ઉભરાઈ રહ્યું છે. ક્રિસમસ અને આગામી નવા વર્ષની ઉજવણી માટે છેલ્લા 24 કલાકમાં જ અંદાજે 50 થી 60 હજાર પ્રવાસીઓ મનાલી પહોંચ્યા છે. બુધવારે એક જ દિવસમાં મનાલીમાં 1500 થી વધુ પ્રવાસી વાહનોની એન્ટ્રી થતા માલ રોડ અને આસપાસના રસ્તાઓ પર પગ મૂકવાની પણ જગ્યા બચી નથી. પ્રવાસીઓના આ જંગી ધસારાને પહોંચી વળવા માટે પ્રશાસને શહેરને 4 સેક્ટરમાં વહેંચી દીધું છે.
કુલ્લુના ડીસી તોરુલ એસ. રવીશ અને એસપી મદનલાલ કૌશલે સુરક્ષા વ્યવસ્થા સખત કરી છે. પ્રવાસીઓના મનોરંજન માટે માલ રોડ પર ખાસ ડીજે (DJ) સિસ્ટમ લગાવવામાં આવી છે, જે 31 ડિસેમ્બર સુધી રાત્રિના સમયે ચાલુ રહેશે. જોકે, પ્રવાસીઓની ભારે ભીડને કારણે હોટલોમાં ઓક્યુપન્સી ફૂલ થઈ ગઈ છે અને રસ્તાઓ પર કલાકો સુધી ટ્રાફિક જામની સમસ્યા સર્જાઈ રહી છે. પાર્કિંગની અછતને કારણે સહેલાણીઓને ભારે હાલાકીનો સામનો કરવો પડી રહ્યો છે.
 મનાલીથી આગળ અટલ ટનલ, કોકસર અને ગ્રામ્ફુ સુધી પ્રવાસીઓને જવા દેવામાં આવી રહ્યા છે, જ્યાં મોટી સંખ્યામાં લોકો બરફની મજા માણી રહ્યા છે. રોહતાંગ પાસ અને શિંકુલા પાસ જવા માટે હાલમાં માત્ર ફોર-બાય-ફોર (4x4) વાહનોને જ મંજૂરી અપાઈ છે. ગ્રામ્ફુ પાસે વાહનોની લાંબી લાઈનોના વીડિયો સોશિયલ મીડિયા પર વાયરલ થઈ રહ્યા છે, જે મનાલીમાં પર્યટનની લોકપ્રિયતાની સાક્ષી પૂરે છે.
 કુલ્લુ પોલીસે ક્રિસમસ અને ન્યૂ યરના જશ્નમાં કોઈ ખલેલ ન પહોંચે તે માટે 300 વધારાના પોલીસ જવાનો અને હોમગાર્ડ્સ તૈનાત કર્યા છે. એસપી મદનલાલ કૌશલે જણાવ્યું હતું કે, હુલ્લડખોરો પર નજર રાખવા માટે સિવિલ ડ્રેસમાં પણ પોલીસ કર્મચારીઓ તૈનાત રહેશે. તેમણે પ્રવાસીઓને અપીલ કરી છે કે તેઓ ટ્રાફિકના નિયમોનું પાલન કરે અને ઓવરટેક ન કરે. નિયમોનું ઉલ્લંઘન કરનારાઓ સામે પોલીસ કડક કાર્યવાહી કરશે.