મુંબઈ: જ્વેલરીની દુનિયામાં વિશ્વાસનું બીજું નામ એટલે ટાટા ગ્રુપની ‘ટાઇટન’ કંપની. હવે આ દિગ્ગજ કંપનીએ બદલાતા સમય અને નવી ટેકનોલોજીને અપનાવતા ‘લેબ-ગ્રોન ડાયમંડ’ (LGD) એટલે કે પ્રયોગશાળામાં તૈયાર કરવામાં આવતા હીરાના બજારમાં સત્તાવાર પ્રવેશની જાહેરાત કરી છે. ટાઇટને આ ખાસ સેગમેન્ટ માટે ‘beYon’ નામની એક નવી જ બ્રાન્ડ લોન્ચ કરી છે, જે જ્વેલરી ઉદ્યોગમાં મોટી ઉથલપાથલ મચાવશે તેવી શક્યતા છે.
 ટાઇટનની આ નવી બ્રાન્ડ ‘beYon’ નો પ્રારંભ આર્થિક રાજધાની મુંબઈથી થવા જઈ રહ્યો છે. આગામી ૨૯ ડિસેમ્બરે મુંબઈમાં આ બ્રાન્ડનો પ્રથમ એક્સક્લુઝિવ રિટેલ સ્ટોર જનતા માટે ખુલ્લો મૂકવામાં આવશે. જાણવા મળ્યું છે કે ટાઇટને પોતાની જ પેટાકંપની ‘કેરેટલેન’ના એક હાલના સ્ટોરને નવો ઓપ આપીને આ બ્રાન્ડ માટે તૈયાર કર્યો છે. મુંબઈ બાદ ટૂંક સમયમાં દિલ્હી જેવા મોટા શહેરોમાં પણ તેના સ્ટોર્સ શરૂ કરવામાં આવશે.
 ‘beYon’ બ્રાન્ડ ખાસ કરીને આધુનિક મહિલાઓની ફેશન અને જીવનશૈલીને ધ્યાનમાં રાખીને તૈયાર કરવામાં આવી છે. લેબ-ગ્રોન ડાયમંડ દેખાવમાં અને ગુણધર્મોમાં કુદરતી હીરા જેવા જ હોય છે, પરંતુ તેની કિંમત ઘણી ઓછી હોય છે. ટાઇટનનો ઉદ્દેશ્ય એવા ગ્રાહકો સુધી પહોંચવાનો છે જેઓ હીરાના દાગીના પહેરવાનું સપનું રાખે છે પણ બજેટને કારણે પાછા પડે છે. આ જ્વેલરીને કુદરતી હીરાના એક સ્ટાઇલિશ અને સસ્તા વિકલ્પ તરીકે માર્કેટમાં ઉતારવામાં આવશે.
 ભારતીય જ્વેલરી ઉદ્યોગ માટે આ એક ઐતિહાસિક ક્ષણ છે, કારણ કે ટાઇટન જેવી મોટી સંગઠિત કંપનીએ પહેલીવાર લેબ-ગ્રોન ડાયમંડમાં ઔપચારિક પ્રવેશ કર્યો છે. નિષ્ણાતો માને છે કે ટાઇટનના આવવાથી આ સેગમેન્ટમાં સ્પર્ધા વધશે અને ગ્રાહકોનો લેબ-ગ્રોન હીરા પર વિશ્વાસ વધશે. જોકે, કંપનીએ એવી રીતે પ્લાનિંગ કર્યું છે કે જેથી તેમના પરંપરાગત હીરાના બિઝનેસ (તનિષ્ક) પર કોઈ નકારાત્મક અસર ન પડે.
રોકાણકારોની નજર: ટાટા ગ્રુપના આ વ્યૂહાત્મક પગલાથી શેરબજારમાં રોકાણકારો પણ ઉત્સાહિત છે. લાંબા ગાળે આ નવી બ્રાન્ડ ટાઇટનની આવકમાં મોટો વધારો કરી શકે છે. લેબ-ગ્રોન ડાયમંડ માર્કેટ હાલમાં વિશ્વભરમાં ઝડપથી વિકસી રહ્યું છે કારણ કે તે પર્યાવરણને અનુકૂળ (Eco-friendly) પણ માનવામાં આવે છે. ટાઇટન હવે આ ગ્લોબલ ટ્રેન્ડનો ફાયદો ઉઠાવીને ભારતીય મધ્યમ વર્ગના ઘરોમાં હીરા પહોંચાડવાનું લક્ષ્ય રાખે છે