મુંબઈ : ભારતીય અર્થતંત્ર માટે અત્યંત શુભ સમાચાર સામે આવ્યા છે. ભારતીય રિઝર્વ બેંક (RBI) દ્વારા જાહેર કરવામાં આવેલા તાજા આંકડા મુજબ, દેશના વિદેશી હૂંડિયામણ ભંડારમાં જબરદસ્ત ઉછાળો જોવા મળ્યો છે. ૧૯ ડિસેમ્બરના રોજ પૂરા થયેલા સપ્તાહમાં ભારતનું વિદેશી હૂંડિયામણ ભંડાર ૪.૩૮ અબજ ડોલર વધીને ૬૯૩.૩૨ અબજ ડોલર ના સ્તરે પહોંચી ગયું છે. આ આશ્ચર્યજનક વધારા પાછળનું મુખ્ય કારણ દેશના સોનાના ભંડારમાં થયેલો સતત વધારો છે.
 વિદેશી હૂંડિયામણ ભંડારમાં થયેલા કુલ ૪.૪ અબજ ડોલરના વધારામાં અડધાથી વધુ હિસ્સો માત્ર સોનાનો છે. છેલ્લા એક સપ્તાહમાં સોનાના ભંડારનું મૂલ્ય ૨.૬૨ અબજ ડોલર વધીને ૧૧૦.૩૬ અબજ ડોલર થઈ ગયું છે. જો આપણે ભારતીય રૂપિયામાં આની ગણતરી કરીએ તો, એક જ અઠવાડિયામાં સોનાના ભંડારમાં ૧૨,૦૦૦ કરોડ રૂપિયાનો જંગી વધારો થયો છે. હાલમાં RBI પાસે રહેલા કુલ સોનાની કિંમત અંદાજે ૯.૮૬ લાખ કરોડ રૂપિયા જેટલી થાય છે.
 રસપ્રદ વાત એ છે કે, વિદેશી હૂંડિયામણ ભંડારમાં સોનાના ભંડારમાં ડોલર અને રૂપિયા બંનેની દ્રષ્ટિએ વધારો થયો છે. બીજી તરફ, ૧૯ ડિસેમ્બરના રોજ પૂરા થયેલા સપ્તાહ દરમિયાન ભારતીય રૂપિયો પણ મજબૂત થયો છે. અઠવાડિયાના અંતે રૂપિયો આશરે ૧% જેટલો મજબૂત થયો હોવાનું નોંધાયું છે. જોકે, રૂપિયાની આ મજબૂતીને કારણે કુલ રિઝર્વના મૂલ્યમાં રૂપિયાની દ્રષ્ટિએ થોડો ઘટાડો જોવા મળ્યો છે, જે ૬૨ લાખ કરોડ રૂપિયાની નીચે પહોંચી ગયું છે.
 ભારતના વિદેશી હૂંડિયામણ ભંડારનો એક મુખ્ય ભાગ ગણાતી 'વિદેશી ચલણ સંપત્તિ' (FCA) માં પણ ૧.૬૪૧ અબજ ડોલરનો વધારો થયો છે, જે હવે ૫૫૯.૪૨ અબજ ડોલર પર પહોંચી છે. છેલ્લા ત્રણ અઠવાડિયાથી ભારતની તિજોરીમાં સતત વધારો થઈ રહ્યો છે, જે દર્શાવે છે કે વૈશ્વિક આર્થિક અનિશ્ચિતતા વચ્ચે પણ ભારતની આર્થિક સ્થિતિ અત્યંત સુરક્ષિત અને મજબૂત છે.
 નિષ્ણાતો માને છે કે RBI દ્વારા વ્યૂહાત્મક રીતે સોનાની ખરીદી અને વિદેશી મુદ્રાના સંચાલનને કારણે ભારત આજે વિશ્વના સૌથી વધુ વિદેશી હૂંડિયામણ ધરાવતા દેશોની યાદીમાં મજબૂત સ્થાન ધરાવે છે. સોનાના વધતા ભાવ અને RBI ના સુરક્ષિત રોકાણને કારણે દેશની આંતરરાષ્ટ્રીય સ્તરે શાખ વધી છે, જે ભવિષ્યમાં આર્થિક કટોકટી જેવી સ્થિતિ સામે રક્ષણ પૂરું પાડશે