વોશિંગ્ટન  : અમેરિકાના સંરક્ષણ મંત્રાલય 'પેન્ટાગોન'ના નવા અહેવાલે વૈશ્વિક સત્તા સંતુલનમાં આવેલા મોટા બદલાવ તરફ ઈશારો કર્યો છે. રિપોર્ટ અનુસાર, ચીન અત્યારે સંખ્યાની દ્રષ્ટિએ વિશ્વની સૌથી મોટી નૌકાદળ લડાયક શક્તિ બની ગયું છે. ચીન પાસે હાલમાં ૨૩૪ સક્રિય યુદ્ધ જહાજો છે, જે અમેરિકાની ૨૧૯ જહાજોની સંખ્યાને વટાવી ગયા છે. આ અહેવાલ માત્ર સંખ્યા પૂરતો મર્યાદિત નથી, પણ તે ચીનની એ આક્રમક રણનીતિને પણ ઉજાગર કરે છે જેમાં તેણે મિસાઈલ સજ્જ ૨૨ કોર્વેટ્સને કોસ્ટ ગાર્ડમાંથી સીધા નૌકાદળમાં તૈનાત કર્યા છે. ડ્રેગનની આ વધતી તાકાત પશ્ચિમી દેશો માટે ચિંતાનો વિષય બની છે, કારણ કે ચીન હવે માત્ર પોતાની સરહદ નહીં પણ ખુલ્લા સમુદ્ર પર રાજ કરવાની મહત્વાકાંક્ષા ધરાવે છે.

જોકે, સંખ્યાત્મક રીતે આગળ હોવા છતાં ચીન હજુ પણ બે મુખ્ય મોરચે અમેરિકાથી પાછળ છે: સબમરીન અને એરક્રાફ્ટ કેરિયર્સ. અમેરિકા પાસે અત્યારે વિશ્વના કુલ ૨૨ માંથી ૧૧ એરક્રાફ્ટ કેરિયર્સ છે, જે તમામ પરમાણુ સંચાલિત હોવાથી લાંબા સમય સુધી સમુદ્રમાં રહી શકે છે. તેની સામે ચીન પાસે માત્ર ત્રણ કેરિયર્સ છે, જેમાં તાજેતરમાં સામેલ થયેલું 'ફુજિયન' સૌથી આધુનિક છે. પરંતુ પેન્ટાગોને ચેતવણી આપી છે કે ચીન આ અંતરને ૨૦૩૫ સુધીમાં ભરી દેશે. ચીન અત્યારે 'ટાઈપ-૦૦૪' નામના પોતાના પ્રથમ પરમાણુ સંચાલિત વિમાનવાહક જહાજ પર કામ કરી રહ્યું હોવાના અહેવાલો છે, જે અમેરિકાના એકાધિકારને સીધો પડકાર ફેંકી શકે છે.

સૌથી વધુ ચોંકાવનારી બાબત એ છે કે જ્યારે ચીન પોતાની શક્તિ વધારી રહ્યું છે, ત્યારે અમેરિકા તેના જહાજોના નિર્માણમાં વિલંબનો સામનો કરી રહ્યું છે. સપ્લાય ચેઈન અને કાચા માલની અછતને કારણે અમેરિકાના નવા ફોર્ડ-ક્લાસ જહાજોના લોન્ચિંગમાં વર્ષોનો વિલંબ થઈ રહ્યો છે. બીજી તરફ, ચીને તાજેતરમાં તાઈવાનની નાકાબંધી કરીને અને 'ડબલ કેરિયર' કવાયત કરીને સ્પષ્ટ સંકેત આપ્યો છે કે તે હવે યુદ્ધ માટે તૈયાર છે. જો ચીન ૨૦૩૫ સુધીમાં એરક્રાફ્ટ કેરિયર્સની સંખ્યામાં અમેરિકાની બરાબરી કરી લેશે, તો સમુદ્રી માર્ગો પરનો કબ્જો અને વૈશ્વિક વેપાર પર તેનું વર્ચસ્વ આખા વિશ્વ માટે ખતરાની ઘંટડી સમાન સાબિત થશે.