નવી દિલ્હી: વર્ષ ૨૦૨૫ સોનાના ભાવ માટે ઐતિહાસિક સાબિત થયું છે. વર્ષની શરૂઆતમાં જે સોનું ₹૮૦,૦૦૦ પ્રતિ ૧૦ ગ્રામ હતું, તે આજે આસમાને પહોંચીને ₹૧.૪૨ લાખના સ્તરે ટ્રેડ થઈ રહ્યું છે. ભાવમાં થયેલા આ તોતિંગ વધારાએ સામાન્ય માણસના ખિસ્સા પર ભાર તો વધાર્યો છે, પરંતુ સોના પ્રત્યેનો ભારતીયોનો મોહ ઓછો થયો નથી. ઉલટાનું, લોકોએ હવે ૨૨-કેરેટના પરંપરાગત સોનાને બદલે ૧૪ અને ૧૮-કેરેટના સ્માર્ટ વિકલ્પો પસંદ કરવાનું શરૂ કર્યું છે.
કેરેટ ઘટ્યું પણ ક્રેઝ વધ્યો: કેમ લોકપ્રિય થઈ રહ્યું છે 14-18 કેરેટ?
અત્યાર સુધી ૧૪ અને ૧૮-કેરેટ સોનાનો ઉપયોગ માત્ર હીરાના દાગીનામાં જ થતો હતો, કારણ કે તે વધુ મજબૂત હોય છે. પરંતુ હવે કિંમતો વધતા ગ્રાહકોની માનસિકતા બદલાઈ છે. શુદ્ધતા થોડી ઓછી હોવાને કારણે આ કેરેટના દાગીના બજેટમાં ફિટ બેસે છે અને તેમાં ડિઝાઇન પણ ખૂબ આકર્ષક મળે છે. લોકો હવે વજન કરતાં ડિઝાઇન અને પોકેટ-ફ્રેન્ડલી બજેટને વધુ મહત્વ આપી રહ્યા છે.
લગ્નના દાગીનામાં મોટું પરિવર્તન
અમદાવાદ જ્વેલર્સ એસોસિએશનના આંકડા મુજબ, લગ્નની ખરીદીમાં પણ મોટો બદલાવ આવ્યો છે. બે વર્ષ પહેલાં લગ્નના દાગીનામાં ૨૨-કેરેટ સોનાનો હિસ્સો ૭૫ ટકા રહેતો હતો, જે હવે ઘટીને ૫૦ ટકા પર આવી ગયો છે. લોકો હવે આખા સેટને બદલે હળવા અને ઓછા કેરેટના દાગીના પસંદ કરી રહ્યા છે, જેથી દેખાવ પણ જળવાઈ રહે અને લગ્નનું બજેટ પણ ખોરવાય નહીં.
શહેરો પ્રમાણે કિંમતોમાં મોટો તફાવત
દેશભરમાં સોનાના ભાવમાં તફાવત જોવા મળી રહ્યો છે. હૈદરાબાદમાં સોનું ₹૧.૪૦ લાખની આસપાસ છે, જ્યારે ચેન્નાઈમાં ભાવ તેનાથી વધુ છે. આ તફાવતને કારણે ગ્રાહકો હવે કયા શહેરમાંથી ખરીદી કરવી તે બાબતે પણ ખૂબ ગણતરીબાજ બન્યા છે. જ્વેલરી માર્કેટમાં હવે શુદ્ધતા કરતા 'સ્માર્ટ ચોઈસ'નો ટ્રેન્ડ વધુ દેખાઈ રહ્યો છે.
શું 2026માં પણ આવી જ તેજી રહેશે?
બજારના નિષ્ણાતો અને કોટક મહિન્દ્રા AMCના નિલેશ શાહના જણાવ્યા મુજબ, ૨૦૨૫ જેવી તોફાની તેજી ૨૦૨૬માં કદાચ જોવા ન મળે. જોકે, સેન્ટ્રલ બેંકોની સતત ખરીદીને કારણે સોનાનો આઉટલુક પોઝિટિવ છે. નિષ્ણાતો રોકાણકારોને સલાહ આપે છે કે સોનામાં ઉતાવળે રોકાણ કરવાને બદલે સંતુલિત આયોજન કરવું જોઈએ. ટૂંકમાં, મોંઘા સોનાએ ગ્રાહકોને વધુ સમજદાર અને સ્માર્ટ બનાવ્યા છે.