ચેન્નાઈ: તમિલનાડુમાં ચૂંટણી પંચ દ્વારા બહાર પાડવામાં આવેલી ડ્રાફ્ટ મતદાર યાદી બાદ નવા મતદારોમાં ભારે ઉત્સાહ જોવા મળી રહ્યો છે. માત્ર એક અઠવાડિયાના ટૂંકા ગાળામાં જ ૧.૮૫ લાખથી વધુ લોકોએ ફોર્મ-૬ ભરીને નવા મતદાર તરીકે નોંધણી કરાવવા માટે અરજી કરી છે. રાજ્ય સરકાર અને ચૂંટણી પંચ દ્વારા મતદારોને પડતી મુશ્કેલીઓ દૂર કરવા માટે મહત્વના નિર્ણયો લેવામાં આવ્યા છે.
સરકારનો મોટો નિર્ણય: ફી માફી અને મેન્યુઅલ પ્રમાણપત્રો
નવા મતદારોને નોંધણી માટે જરૂરી દસ્તાવેજો મેળવવામાં સરળતા રહે તે માટે તમિલનાડુ સરકારે એક મહત્વની જાહેરાત કરી છે. ૨૬ ડિસેમ્બરથી ૨૫ જાન્યુઆરી ૨૦૨૬ સુધીના એક મહિનાના સમયગાળા માટે જન્મ પ્રમાણપત્ર મેળવવા માટે વસૂલવામાં આવતી ૬૦ રૂપિયાની ફી માફ કરી દેવામાં આવી છે. અત્યાર સુધી આ પ્રમાણપત્રો માત્ર ઓનલાઇન જ મળતા હતા, પરંતુ હવે લોકો તાલુકા મથકોએ જઈને મેન્યુઅલી (રૂબરૂ) પણ પ્રમાણપત્રો મેળવી શકશે.
ડ્રાફ્ટ યાદીમાં મોટા પાયે નામોની બાદબાકી
ચૂંટણી પંચે હાથ ધરેલા 'સઘન સુધારા' (SIR) ના અંતે ડ્રાફ્ટ યાદીમાં ચોંકાવનારા આંકડા સામે આવ્યા છે. રાજ્યમાં કુલ ૯૭.૩૭ લાખ મતદારોના નામ યાદીમાંથી દૂર કરવામાં આવ્યા છે. જેમાં:
•    ૬૬.૪ લાખ મતદારોએ રહેઠાણ બદલ્યું હોવાથી નામ કમી થયા.
•    ૨૬.૯ લાખ મતદારોના મૃત્યુ બાદ નામ દૂર કરાયા.
•    ૩.૯૮ લાખ લોકોના બે અલગ-અલગ જગ્યાએ નામ હોવાથી તે કાઢી નાખવામાં આવ્યા છે.
રાજકીય પક્ષો પણ સક્રિય
આ સુધારણા પ્રક્રિયામાં રાજકીય પક્ષો પણ પૂરજોશમાં ભાગ લઈ રહ્યા છે. DMK અને AIADMK જેવા મુખ્ય પક્ષોએ મતદારોના નામ ઉમેરવા અને વાંધા દાખલ કરવા માટે અનેક દાવાઓ રજૂ કર્યા છે. ડ્રાફ્ટ યાદી મુજબ હાલમાં રાજ્યમાં કુલ મતદારોની સંખ્યા ૫.૪૩ કરોડ છે, જે ગત નવેમ્બર મહિનામાં ૬.૪૧ કરોડ હતી. ૧૭ ફેબ્રુઆરી, ૨૦૨૬ના રોજ જ્યારે ફાઈનલ લિસ્ટ આવશે ત્યારે રાજ્યનું ચોક્કસ મતદાર સંખ્યાનું ચિત્ર સ્પષ્ટ થશે.