ચેન્નાઈ  : તમિલનાડુના વિવાદાસ્પદ અને લોકપ્રિય યુટ્યુબર 'સાવુક્કુ' શંકર શનિવારે ચેન્નાઈની પુઝાલ સેન્ટ્રલ જેલમાંથી મુક્ત થયા છે. મદ્રાસ હાઈકોર્ટની વેકેશન બેન્ચે તેમને ત્રણ મહિનાના વચગાળાના જામીન આપતા રાજ્ય સરકાર અને પોલીસ તંત્રની કાર્યશૈલી પર ગંભીર સવાલો ઉઠાવ્યા છે. જેલમાંથી બહાર નીકળ્યા બાદ શંકરે સોશિયલ મીડિયા પ્લેટફોર્મ 'X' પર પોતાનો ફોટો પોસ્ટ કરીને સત્તાધીશોને સીધો પડકાર ફેંક્યો હતો.
માંદગી અને માનવ અધિકારોને આધારે જામીન
શંકરની માતા કમલાએ હાઈકોર્ટમાં અપીલ કરી હતી કે તેમના પુત્રને હૃદય રોગ અને ડાયાબિટીસની ગંભીર બીમારી છે, જેના માટે તાત્કાલિક સારવારની જરૂર છે. ન્યાયાધીશ એસ.એમ. સુબ્રમણ્યમ અને પી. ધનાબલની બેન્ચે શંકરના મેડિકલ ઇતિહાસ અને તેમની વ્યક્તિગત સ્વતંત્રતા પર વારંવાર મુકાતા પ્રતિબંધોને ધ્યાનમાં રાખીને તેમને ૨૬ ડિસેમ્બર ૨૦૨૫ થી ૨૫ માર્ચ ૨૦૨૬ સુધી (૧૨ અઠવાડિયા) મુક્ત કરવાનો આદેશ આપ્યો હતો.
કોર્ટની સરકારને આકરી ફટકાર
જામીન આપતી વખતે હાઈકોર્ટે અત્યંત કડક શબ્દોમાં કહ્યું કે, "કોર્ટ એ સમજી શકતી નથી કે એક જ વ્યક્તિને વારંવાર કેમ કેદ કરવામાં આવે છે? શું તે કોઈના અંગત નિશાન પર છે?" બેન્ચે વધુમાં ઉમેર્યું કે કોઈ ચોક્કસ વ્યક્તિ સરકારની તરફેણમાં ન હોય તો કાયદાનો દુરુપયોગ કરીને તેને લક્ષ્ય બનાવવો જોઈએ નહીં. અગાઉ ઓગસ્ટ ૨૦૨૪માં પણ કોર્ટે શંકર વિરુદ્ધનો 'ગુંડા એક્ટ' રદ કર્યો હતો, તેમ છતાં ફરીથી ધરપકડ થતા કોર્ટે આશ્ચર્ય વ્યક્ત કર્યું હતું.
શું હતો કેસ?
સાવુક્કુ મીડિયાના સીઈઓ એવા શંકરની ૧૩ ડિસેમ્બરે તેમના નિવાસસ્થાનેથી ધરપકડ કરવામાં આવી હતી. તેમના પર એક ફિલ્મ નિર્માતા પર હુમલો કરવાનો અને ખંડણી માંગવાનો આરોપ મૂકવામાં આવ્યો હતો. જોકે, શંકરના સમર્થકો આ ધરપકડને રાજકીય કિન્નાખોરી ગણાવી રહ્યા છે. કોર્ટે શંકરને એક લાખ રૂપિયાના પર્સનલ બોન્ડ ભરવાની શરતે મુક્ત કર્યા છે અને પોલીસને તાકીદ કરી છે કે કાયદાની પ્રક્રિયાનો દુરુપયોગ થવો જોઈએ નહીં.
પુઝાલ જેલની બહાર શંકરના સમર્થકો મોટી સંખ્યામાં ઉમટી પડ્યા હતા, જેના કારણે વાતાવરણ ગરમાયું હતું. હવે જોવાનું એ રહેશે કે ત્રણ મહિનાની આ મુક્તિ દરમિયાન શંકર ફરીથી સરકાર વિરોધી વીડિયોઝની શ્રેણી શરૂ કરે છે કે કેમ.