નવી દિલ્હી : સમગ્ર ઉત્તર ભારત અત્યારે હાડ થીજવતી ઠંડી અને ગાઢ ધુમ્મસની લપેટમાં છે. ભારતીય હવામાન વિભાગ (IMD) એ આજે જારી કરેલી તાજી આગાહી મુજબ, પંજાબ, હરિયાણા અને ચંદીગઢમાં આગામી ૩૦ ડિસેમ્બર સુધી 'ગાઢ થી અતિ ગાઢ' ધુમ્મસ છવાયેલું રહેશે. આ સ્થિતિને કારણે હાઈવે પર વાહન વ્યવહાર અને રેલ્વે સેવાઓ પર માઠી અસર પડવાની શક્યતા છે.
શીત લહેર અને 'કોલ્ડ ડે' ની ચેતવણી
હવામાન વિભાગના જણાવ્યા અનુસાર, મંગળવાર સુધી માત્ર ધુમ્મસ જ નહીં, પરંતુ પંજાબ, હરિયાણા, દિલ્હી, ઉત્તર રાજસ્થાન અને મધ્ય પ્રદેશ તેમજ છત્તીસગઢના ભાગોમાં પણ 'શીત લહેર' (Cold Wave) ની સ્થિતિ પ્રવર્તશે. ખાસ કરીને પૂર્વ ઉત્તર પ્રદેશ અને બિહારમાં 'ઠંડા દિવસ' (Cold Day) ની આગાહી કરવામાં આવી છે, જેના કારણે દિવસના તાપમાનમાં મોટો ઘટાડો નોંધાશે.
દિલ્હીમાં પ્રદૂષણનું જોખમ વધ્યું
એકતરફ ઠંડી વધી રહી છે ત્યારે બીજી તરફ રાષ્ટ્રીય રાજધાની દિલ્હીમાં હવાની ગુણવત્તા (AQI) ચિંતાજનક સ્તરે પહોંચી છે. કેન્દ્રીય પ્રદૂષણ નિયંત્રણ બોર્ડ (CPCB) મુજબ, આજે સાંજે ૭ વાગ્યા સુધીમાં દિલ્હીનો સરેરાશ AQI ૩૯૦ નોંધાયો હતો, જે 'ખૂબ જ ખરાબ' શ્રેણીમાં આવે છે. ઠંડી અને પવનની ઓછી ગતિને કારણે પ્રદૂષણના કણો જમીનની નજીક સ્થિર થઈ રહ્યા છે, જે શ્વાસના દર્દીઓ માટે જોખમી સાબિત થઈ શકે છે.
દક્ષિણમાં વાવાઝોડાનો ખતરો
જ્યારે ઉત્તર ભારત ઠંડીમાં ઠુંઠવાયેલું છે, ત્યારે દેશના દક્ષિણ છેડે સ્થિત આંદામાન અને નિકોબાર ટાપુઓ પર કુદરતનો અલગ મિજાજ જોવા મળશે. હવામાન એજન્સીએ આ મહિનાના અંત સુધી અહીં વાવાઝોડા, વીજળીના કડાકા અને તોફાની પવનો ફૂંકાવાની આગાહી કરી છે.
હવામાન વિભાગે મુસાફરોને ધુમ્મસ દરમિયાન સાવચેતી રાખવા અને ઠંડીથી બચવા માટે જરૂરી પગલાં લેવાની સલાહ આપી છે.