ઢાકા : બાંગ્લાદેશના કેરાનીગંજમાં આવેલી એક મદરેસામાં આજે બપોરે થયેલા શક્તિશાળી વિસ્ફોટે સમગ્ર વિસ્તારને હચમચાવી દીધો છે. આ ઘટના બાદ પોલીસે હાથ ધરેલા મોટા સર્ચ ઓપરેશનમાં આશરે ૨૫૦ કિલો જેટલી બોમ્બ બનાવવાની સામગ્રી જપ્ત કરવામાં આવી છે. વિસ્ફોટ એટલો પ્રચંડ હતો કે તેમાં એક મહિલા અને બે માસૂમ બાળકો સહિત કુલ ચાર લોકો ગંભીર રીતે ઘાયલ થયા છે.
બપોરના સમયે મદરેસા ધણધણી ઉઠ્યો
કેરાનીગંજના હસ્નાબાદ વિસ્તારમાં આવેલી 'ઉમ્મલ કુરા ઇન્ટરનેશનલ મદરેસા'માં બપોરના સુમારે અચાનક વિસ્ફોટ થયો હતો. ધડાકો એટલો જોરદાર હતો કે મદરેસાની ઇમારતની છત અને બીમમાં મોટી તિરાડો પડી ગઈ હતી. વિસ્ફોટની અસરને કારણે નજીકની અન્ય ઇમારતોને પણ નુકસાન પહોંચ્યું હતું. સદનસીબે, આજે સાપ્તાહિક રજા હોવાથી મદરેસામાં વિદ્યાર્થીઓની હાજરી નહોતી, અન્યથા મોટી જાનહાનિ થઈ શકી હોત.
પોલીસના દરોડામાં વિસ્ફોટકોનો પહાડ મળ્યો
ઘટનાની જાણ થતા જ કેરાનીગંજ પોલીસ સ્ટેશનના પ્રભારી અધિકારી સૈફુલ આલમની આગેવાનીમાં પોલીસ કાફલો ઘટનાસ્થળે પહોંચી ગયો હતો. પોલીસના દરોડા દરમિયાન મદરેસામાંથી મોટા પ્રમાણમાં ક્રૂડ બોમ્બ, જોખમી રસાયણો અને વિસ્ફોટક સામગ્રી મળી આવી હતી. બોમ્બ ડિસ્પોઝલ યુનિટ અને ક્રાઇમ સીન યુનિટે તાત્કાલિક સ્થળ પર પહોંચીને આ ખતરનાક સામગ્રીને સુરક્ષિત રીતે નિષ્ક્રિય કરી હતી.
તપાસનો ધમધમાટ: બે મહિલાઓ શંકાના દાયરામાં
પોલીસે આ મામલે પ્રાથમિક પૂછપરછ માટે બે મહિલાઓની અટકાયત કરી છે. પોલીસ એ દિશામાં તપાસ કરી રહી છે કે આટલી મોટી માત્રામાં વિસ્ફોટક સામગ્રી મદરેસામાં કોના ઈશારે અને કયા ઈરાદાથી રાખવામાં આવી હતી. શું આ કોઈ મોટા આતંકી કાવતરાનો ભાગ હતો? તે દિશામાં અત્યારે સઘન તપાસ ચાલી રહી છે.
આ ઘટનાને પગલે સમગ્ર વિસ્તારમાં ભયનો માહોલ જોવા મળી રહ્યો છે અને સુરક્ષા દળોએ પેટ્રોલિંગ વધારી દીધું છે.