બેંગલુરુ: બેંગલુરુમાં હેબ્બલથી સેન્ટ્રલ સિલ્ક બોર્ડ સુધીના ૧૭ કિલોમીટર લાંબા ટનલ રોડ પ્રોજેક્ટ માટે અદાણી જૂથે ૨૦,૪૦૦ કરોડ રૂપિયાની સૌથી ઓછી બોલી લગાવી હોવાથી તેમને આ કોન્ટ્રાક્ટ મળવાની શક્યતા છે.
દેશના આઈટી હબ ગણાતા બેંગલુરુની ટ્રાફિક સમસ્યા હલ કરવા માટેના અત્યંત મહત્વાકાંક્ષી ટનલ રોડ પ્રોજેક્ટમાં અદાણી જૂથ બાજી મારે તેવા સંકેતો મળી રહ્યા છે. બેંગલુરુના હેબ્બલથી સેન્ટ્રલ સિલ્ક બોર્ડ સુધીના ૧૭ કિલોમીટર લાંબા આ ટનલ રોડ માટે ટેન્ડર પ્રક્રિયા હાથ ધરવામાં આવી હતી.
સૂત્રોના જણાવ્યા અનુસાર, અદાણી જૂથે આ પ્રોજેક્ટ માટે ૨૦,૪૦૦ કરોડ રૂપિયાની બોલી લગાવી છે, જે અન્ય સ્પર્ધકોની સરખામણીએ સૌથી ઓછી હોવાનું મનાય છે. જો આ કોન્ટ્રાક્ટ અદાણી જૂથને મળે છે, તો તે ઈન્ફ્રાસ્ટ્રક્ચર ક્ષેત્રે જૂથ માટે એક મોટી ઉપલબ્ધિ ગણાશે.
આ ટનલ રોડ બનવાથી બેંગલુરુના સૌથી વ્યસ્ત વિસ્તારોમાં વાહનવ્યવહારની ગતિ વધશે અને નાગરિકોનો કિંમતી સમય બચશે.