નવી દિલ્હી: કોંગ્રેસ અધ્યક્ષ મલ્લિકાર્જુન ખડગેએ આજે નવી દિલ્હીમાં યોજાયેલી કોંગ્રેસ વર્કિંગ કમિટી (CWC) ની બેઠકમાં કેન્દ્રની મોદી સરકાર સામે મોરચો માંડ્યો હતો. બેઠકની શરૂઆતમાં જ ખડગેએ લોકશાહી અને બંધારણ પર તોળાઈ રહેલા સંકટ અંગે ચેતવણી આપતા જણાવ્યું હતું કે, ગરીબોના અધિકારો છીનવી લેતી આ સરકાર સામે કોંગ્રેસે હવે રસ્તા પર ઉતરીને લડત આપવી પડશે.
ખડગેએ આક્ષેપ કર્યો હતો કે સંસદના શિયાળુ સત્ર દરમિયાન સરકારે મનરેગા (MGNREGA) યોજનાને વ્યવહારિક રીતે સમાપ્ત કરી દીધી છે. તેમણે કહ્યું, "મનરેગા એ માત્ર રોજગારીની યોજના નથી, પણ મહાત્મા ગાંધીના વિચારોનું સન્માન છે. તેને બંધ કરીને સરકારે દેશના કરોડો ગરીબોના પેટ પર લાત મારી છે." ખડગેએ મનરેગાની પુનઃસ્થાપના માટે દેશવ્યાપી જન આંદોલન કરવાની જાહેરાત કરી હતી.
રાષ્ટ્રીય મુદ્દાઓની સાથે ખડગેએ આંતરરાષ્ટ્રીય સ્તરે બાંગ્લાદેશમાં લઘુમતી હિન્દુ સમુદાય પર થઈ રહેલા હુમલાઓની કડક શબ્દોમાં નિંદા કરી હતી. તેમણે ભારત સરકારને આ મામલે મજબૂત રાજદ્વારી પગલાં લેવા વિનંતી કરી હતી. આ સાથે જ ભારતમાં ક્રિસમસના તહેવારો દરમિયાન કેટલાક સંગઠનો દ્વારા કરવામાં આવતી હિંસા અને સૌહાર્દ બગાડવાના પ્રયાસો અંગે પણ તેમણે ચિંતા વ્યક્ત કરી હતી.
બેઠકમાં એપ્રિલ-મે ૨૦૨૬માં આસામ, પશ્ચિમ બંગાળ, તમિલનાડુ, કેરળ અને પુડુચેરીમાં યોજાનારી વિધાનસભા ચૂંટણીઓ અંગે પણ વિસ્તૃત ચર્ચા કરવામાં આવી હતી. ખડગેએ કાર્યકર્તાઓને 'બુથ લેવલ' પર સક્રિય થવા અને મતદાર યાદીમાંથી જાણીજોઈને કાઢી નાખવામાં આવતા નામો (ખાસ કરીને દલિત, આદિવાસી અને લઘુમતીઓના) પર નજર રાખવા સૂચના આપી હતી.
વધુમાં, ખડગેએ ED, IT અને CBI જેવી તપાસ એજન્સીઓના દુરુપયોગનો મુદ્દો પણ ઉઠાવ્યો હતો. તેમણે કહ્યું કે છેલ્લા ૧૧ વર્ષમાં વિરોધ પક્ષના નેતાઓને બદનામ કરવા માટે આ એજન્સીઓનો હથિયાર તરીકે ઉપયોગ કરવામાં આવ્યો છે. નેશનલ હેરાલ્ડ જેવા કેસ દ્વારા કોંગ્રેસના નેતૃત્વને નિશાન બનાવવાની કોશિશ થઈ રહી હોવાનું પણ તેમણે જણાવ્યું હતું.
બેઠકના અંતે સોનિયા ગાંધી, રાહુલ ગાંધી અને શશિ થરૂર સહિતના વરિષ્ઠ નેતાઓએ પણ લોકશાહીના રક્ષણ માટે એકજૂટ થઈને લડવા પર ભાર મૂક્યો હતો