લંડન: બાંગ્લાદેશમાં હિન્દુ લઘુમતી સમુદાય પર થઈ રહેલી હિંસા અને હત્યાઓના પડઘા હવે આંતરરાષ્ટ્રીય સ્તરે પડવા લાગ્યા છે. શનિવારે બ્રિટનની રાજધાની લંડનમાં સ્થિત બાંગ્લાદેશ હાઈ કમિશનની બહાર સેંકડો ભારતીય અને બાંગ્લાદેશી હિન્દુઓએ એકઠા થઈને ભવ્ય વિરોધ પ્રદર્શન કર્યું હતું. આ પ્રદર્શન દરમિયાન વાતાવરણ ત્યારે ભાવુક બની ગયું જ્યારે વિરોધકર્તાઓએ બાંગ્લાદેશનું રાષ્ટ્રગીત "અમાર સોનાર બાંગ્લા" વગાડીને શાંતિ અને લઘુમતીઓની સુરક્ષાની અપીલ કરી હતી.
 લંડન પહેલા ભારતના વિવિધ ભાગોમાં પણ આ મુદ્દે ભારે વિરોધ જોવા મળ્યો હતો. પશ્ચિમ બંગાળના સિલિગુડીમાં ભાજપ દ્વારા એક વિશાળ 'મશાલ રેલી' યોજવામાં આવી હતી. ભાજપ નેતા અનિતા મહતોએ આક્રોશ વ્યક્ત કરતા જણાવ્યું હતું કે, "બાંગ્લાદેશમાં હિન્દુઓને જીવતા સળગાવી દેવામાં આવે છે. જ્યાં સુધી હિન્દુ સમાજ એક નહીં થાય, ત્યાં સુધી આ અત્યાચારો અટકશે નહીં. આપણે આપણા અસ્તિત્વ અને ધર્મ માટે લડવું પડશે."
તાજેતરમાં બાંગ્લાદેશમાં બે હિન્દુ નાગરિકોની કથિત રીતે 'લિંચિંગ' (ભીડ દ્વારા હત્યા) કરી દેવામાં આવી હતી, જેનાથી પશ્ચિમ બંગાળ અને આસામમાં પ્રદર્શનો શરૂ થયા છે. કોલકાતામાં ભગવા વસ્ત્રો પહેરેલા હજારો કાર્યકર્તાઓ રસ્તા પર ઉતરી આવ્યા હતા અને બાંગ્લાદેશ સરકાર પાસે ગુનેગારોને ફાંસીની સજા આપવાની માંગ કરી હતી.
 ભારતીય વિદેશ મંત્રાલયના પ્રવક્તા રણધીર જયસ્વાલે આ મામલે સત્તાવાર નિવેદન જારી કરીને ગંભીર ચિંતા વ્યક્ત કરી છે. તેમણે કહ્યું કે, "ભારત બાંગ્લાદેશમાં હિન્દુઓ, ખ્રિસ્તીઓ અને બૌદ્ધો સહિતના લઘુમતીઓ પર થઈ રહેલા હુમલાઓથી વ્યથિત છે. મૈમનસિંહમાં તાજેતરમાં થયેલી હિન્દુ યુવાનની હત્યાની અમે સખત નિંદા કરીએ છીએ અને અપેક્ષા રાખીએ છીએ કે બાંગ્લાદેશની વચગાળાની સરકાર લઘુમતીઓને સુરક્ષા પૂરી પાડશે."
લંડનથી લઈને દિલ્હી સુધી, હિન્દુ સંગઠનો હવે એકસૂરે બાંગ્લાદેશમાં માનવાધિકારના ઉલ્લંઘન સામે અવાજ ઉઠાવી રહ્યા છે