નવી દિલ્હી: વર્ષ 2025 વિદાય લઈ રહ્યું છે, પરંતુ જતાં-જતાં તે કરદાતાઓ અને ગ્રાહકો માટે કેટલીક આકરી ડેડલાઈન પણ મૂકતું જઈ રહ્યું છે. જો તમે હજી સુધી તમારું આધાર કાર્ડ પાન સાથે લિંક નથી કર્યું, તો 31 ડિસેમ્બર તમારી પાસે છેલ્લી તક છે. આ તારીખ વીત્યા પછી તમારું પાન કાર્ડ માત્ર એક પ્લાસ્ટિકનો ટુકડો બની જશે, જેના કારણે તમે ન તો બેંક ખાતું ઓપરેટ કરી શકશો કે ન તો મ્યુચ્યુઅલ ફંડમાં રોકાણ કરી શકશો. આ સાથે જ, જેમનું આવકવેરા રિટર્ન (ITR) બાકી છે, તેમણે દંડ સાથે પણ વર્ષના અંત સુધીમાં પ્રક્રિયા પૂરી કરી લેવી પડશે, અન્યથા સરકાર પાસે જમા ટેક્સનું રિફંડ મેળવવાની તક તમે કાયમ માટે ગુમાવી શકો છો.

બીજી તરફ, જેઓ નવી કાર ખરીદવાનું સપનું જોઈ રહ્યા છે, તેમના માટે આ અઠવાડિયું 'ગોલ્ડન પીરિયડ' સાબિત થઈ શકે છે. મારુતિ, ટાટા, હ્યુન્ડાઈ અને BMW જેવી દિગ્ગજ કંપનીઓએ જાહેરાત કરી દીધી છે કે ઇનપુટ કોસ્ટ વધવાને કારણે 1 જાન્યુઆરીથી ગાડીઓના ભાવમાં 2 થી 3 ટકાનો વધારો થશે. એટલે કે, જે કામ તમે આજે કરી શકો છો, તે જ કામ માટે નવા વર્ષમાં તમારે હજારો રૂપિયા વધારાના ચૂકવવા પડશે. આ સિવાય, જો તમે સરકારી બચત યોજનાઓમાં રોકાણ કરવાનું વિચારી રહ્યા હોવ, તો વહેલી તકે નિર્ણય લેવો હિતાવહ છે, કારણ કે RBI દ્વારા રેપો રેટમાં ઘટાડો કર્યા બાદ નાની બચત યોજનાઓના વ્યાજ દરમાં કાપ આવવાની પ્રબળ સંભાવના છે.

નાણાકીય નિષ્ણાતોના મતે, વર્ષના અંતે આવતા આ ફેરફારો સામાન્ય માણસના બજેટ પર સીધી અસર કરે છે. ખાસ કરીને વ્યાજ દરમાં સંભવિત ઘટાડો ફિક્સ્ડ ડિપોઝિટ  રાખનારાઓ માટે ચિંતાનો વિષય છે. 5 ડિસેમ્બરે રેપો રેટમાં થયેલા 0.25% ના ઘટાડાની અસર હવે સીધી 11 જેટલી બચત યોજનાઓ પર જોવા મળી શકે છે. આમ, 31 ડિસેમ્બર સુધીમાં તમારા ટેક્સ, રોકાણ અને ખરીદીના નિર્ણયો પૂરા કરી લેવા એ માત્ર શિસ્ત નથી, પણ નાણાકીય સમજદારી પણ છે. નવા વર્ષની ઉજવણીમાં ડૂબી જતા પહેલા આ ચાર મહત્વપૂર્ણ કામોની યાદી તપાસી લેવી અનિવાર્ય છે.