નવી દિલ્હી:  ભારતીય વીમા ક્ષેત્ર માટે આગામી સમય સુવર્ણકાળ સમાન સાબિત થવા જઈ રહ્યો છે. નાણાકીય વર્ષ 2026 માં થોડી ધીમી ગતિ બાદ, હવે નાણાકીય વર્ષ 2027 માં આ ક્ષેત્ર બે આંકડામાં એટલે કે ‘ડબલ ડિજિટ’ વૃદ્ધિ નોંધાવવા માટે તૈયાર છે. આ તેજી પાછળનું મુખ્ય કારણ સરકાર દ્વારા પસાર કરવામાં આવેલું 'સબકા બીમા સબકી રક્ષા બિલ' અને 100% વિદેશી સીધા રોકાણની મંજૂરી છે. આ ફેરફારોને કારણે વૈશ્વિક વીમા કંપનીઓ ભારતમાં મૂડી રોકવા આતુર છે, જેનો સીધો ફાયદો ગ્રાહકોને વધુ સારા વિકલ્પો, સસ્તી પરવડે તેવી પોલિસી અને ઝડપી ક્લેમ સેટલમેન્ટના રૂપમાં મળશે.

ઉદ્યોગ જગતના માંધાતાઓ માને છે કે વીમા પ્રીમિયમ પર GST ના દરમાં કરવામાં આવેલો ઘટાડો ગેમ-ચેન્જર સાબિત થયો છે. નવેમ્બર મહિનામાં જ જીવન અને બિન-જીવન વીમા કંપનીઓના પ્રીમિયમમાં 23% નો મોટો ઉછાળો જોવા મળ્યો છે. બજાજ આલિયાન્ઝના એમડી તપન સિંઘેલ અને યુનિવર્સલ સોમ્પોના શરદ માથુરના જણાવ્યા અનુસાર, જાન્યુઆરીથી માર્ચનું ક્વાર્ટર વીમા ક્ષેત્ર માટે સૌથી વધુ કમાણી કરાવનારું હોય છે. નવા વાહનોના વેચાણ અને ઈન્કમ ટેક્સ બચાવવા માટે લેવાતા હેલ્થ તથા લાઈફ ઈન્શ્યોરન્સને કારણે માર્ચ સુધીમાં માર્કેટ 7-8% થી વધીને 10% થી વધુની વૃદ્ધિ હાંસલ કરી લેશે.

ભવિષ્યના અંદાજો મુજબ, કેરએજ રેટિંગ્સ જણાવે છે કે આગામી બે વર્ષમાં જીવન વીમા ઉદ્યોગ 8-11 ટકાના દરે વૃદ્ધિ પામશે. હવે કંપનીઓ માત્ર કવરેજ વધારવા પર જ નહીં, પણ નિવૃત્તિ (Retirement) અને પેન્શન પ્લાન્સ પર વધુ ભાર મૂકી રહી છે. ડિજિટલ સોલ્યુશન્સ અને ગ્રામીણ વિસ્તારોમાં વધતી આવકને કારણે ટર્મ ઇન્શ્યોરન્સની માંગમાં પણ ધરખમ વધારો થઈ રહ્યો છે. નિષ્ણાતોના મતે, વીમા ક્ષેત્ર હવે ભારતની આર્થિક વૃદ્ધિની ગાથાનો અભિન્ન હિસ્સો બની ગયું છે, જે આગામી વર્ષોમાં લાખો નવી નોકરીઓનું સર્જન કરશે.