કાઠમંડુ, તા.૨૯ : નેપાળના રાજકારણમાં દાયકાઓથી ચાલી આવતા પરંપરાગત પક્ષોના શાસનનો અંત લાવવા માટે બે લોકપ્રિય યુવા નેતાઓએ હાથ મિલાવ્યા છે. કાઠમંડુના લોકપ્રિય મેયર અને પૂર્વ રેપર બાલેન્દ્ર શાહ (બાલેન) રવિવારે સત્તાવાર રીતે ‘રાષ્ટ્રીય સ્વતંત્ર પાર્ટી’ (RSP) માં જોડાયા છે. આગામી ૫ માર્ચ ૨૦૨૬ ના રોજ યોજાનારી સંસદીય ચૂંટણીમાં બાલેન્દ્ર શાહને વડાપ્રધાન પદના ઉમેદવાર તરીકે જાહેર કરવામાં આવ્યા છે.
સમજૂતીના મુખ્ય મુદ્દા
RSP ના વડા રબી લામિછાને અને બાલેન શાહ વચ્ચે થયેલા ૭ મુદ્દાના કરાર મુજબ, ચૂંટણીમાં પક્ષ તેના જૂના નામ અને ‘ઘંટડી’ (Bell) ના ચિન્હ સાથે જ લડશે. જો RSP ને બહુમતી મળશે, તો ૩૫ વર્ષીય બાલેન શાહ નેપાળના વડાપ્રધાન બનશે અને સંસદીય દળના નેતા તરીકે જવાબદારી સંભાળશે, જ્યારે રબી લામિછાને પક્ષના સંગઠનનું નેતૃત્વ કરશે.
‘જનરેશન-ઝેડ’ ની શક્તિ
આ જોડાણ પાછળ સપ્ટેમ્બરમાં થયેલા ‘જનરેશન-ઝેડ’ (યુવાનો) ના વિરોધ પ્રદર્શનો મુખ્ય કારણ માનવામાં આવે છે. ભ્રષ્ટાચાર સામેના આ આંદોલનમાં ૭૭ લોકોએ જીવ ગુમાવ્યા હતા અને તત્કાલીન વડાપ્રધાન કે.પી. શર્મા ઓલીએ રાજીનામું આપવું પડ્યું હતું. હાલમાં પૂર્વ મુખ્ય ન્યાયાધીશ સુશીલા કાર્કીની વચગાળાની સરકાર હેઠળ ચૂંટણી યોજાવા જઈ રહી છે. નેપાળના અંદાજે ૧.૯ કરોડ મતદારોમાં મોટી સંખ્યા યુવાનોની છે, જેઓ આ નવા જોડાણ તરફ આકર્ષાય તેવી પૂરેપૂરી શક્યતા છે.
પરંપરાગત પક્ષોમાં ફફડાટ
છેલ્લા ત્રણ દાયકાથી સત્તા ભોગવી રહેલા નેપાળી કોંગ્રેસ અને કમ્યુનિસ્ટ પાર્ટી ઓફ નેપાળ (UML) માટે આ નવું જોડાણ મોટો પડકાર બની રહ્યું છે. વિશ્લેષકોના મતે, આ એક વ્યૂહાત્મક પગલું છે જેનાથી તમામ ‘વૈકલ્પિક શક્તિઓ’ એક મંચ પર આવી રહી છે. બાલેન શાહની યુવાનોમાં રહેલી લોકપ્રિયતા અને રબી લામિછાનેનું રાજકીય સંગઠન સાથે મળીને નેપાળના ભવિષ્યને નવી દિશા આપી શકે છે.