નવી મુંબઈ : સામાન્ય રીતે કોઈ પણ મોટા પ્રોજેક્ટ કે એરપોર્ટના લોન્ચિંગ સમયે બોલિવૂડ સેલિબ્રિટીઓ અને વીઆઈપી મહેમાનોનો જમાવડો જોવા મળતો હોય છે, પરંતુ નવી મુંબઈ આંતરરાષ્ટ્રીય એરપોર્ટ (NMIA) એ એક નવી અને પ્રશંસનીય પરંપરા શરૂ કરી છે. ૨૪ ડિસેમ્બરની રાત્રે આયોજિત એક ખાનગી ડ્રોન શોએ ઈન્ટરનેટ પર ભારે વાહવાહી મેળવી છે, કારણ કે આ શો કોઈ સ્ટાર માટે નહીં, પરંતુ એરપોર્ટ તૈયાર કરનાર 'વાસ્તવિક નાયકો' માટે હતો.
ગ્લેમર નહીં, પણ માનવતાનો ઉત્સવ
સોશિયલ મીડિયા પર વાયરલ થયેલા ૧૦-૧૫ સેકન્ડના વીડિયોમાં જોઈ શકાય છે કે આકાશમાં ડ્રોન દ્વારા સુંદર આકૃતિઓ રચાઈ રહી છે. આ કાર્યક્રમમાં કોઈ પણ પ્રકારની સત્તાવાર ધામધૂમ કરવામાં આવી નહોતી. તેમ છતાં, જ્યારે ત્યાં હાજર બાંધકામ કામદારો, ગ્રાઉન્ડ વર્કર્સ, પ્રોજેક્ટ ક્રૂ અને દિવ્યાંગ કર્મચારીઓ (મિટ્ટી કાફેના સભ્યો) એ આ દ્રશ્યો જોયા અને તેમના પરિવારો સાથે વીડિયો શેર કર્યા, ત્યારે નેટીઝન્સ ભાવુક થઈ ગયા હતા.
લોકોએ કેમ વખાણ્યા?
ઇન્સ્ટાગ્રામ અને X (ટ્વિટર) પર લોકોએ કેપ્શન લખ્યા કે, "સેલિબ્રિટીઝને નહીં, પણ ખરા અર્થમાં જેમણે પરસેવો પાડીને આ એરપોર્ટ બનાવ્યું છે તેવા કામદારોને આભાર માનવાની આ રીત અદ્ભુત છે." અનેક પોસ્ટમાં જણાવાયું હતું કે મુસાફરોનું આગમન થાય તે પહેલાં, એરપોર્ટ તંત્રે આ ડ્રોન શો દ્વારા સામૂહિક પરિશ્રમ અને શ્રમિકોની નિષ્ઠાને શ્રદ્ધાંજલિ આપી છે.
ભાવિ પ્રવાસીઓ માટે ખાસ સંદેશ
આ ડ્રોન શો ટેકનોલોજીના પ્રદર્શન કરતાં પણ વધુ હૃદયસ્પર્શી એટલા માટે હતો કારણ કે તેમાં કામદારોના બાળકો પણ આ રોશનીને નિહાળી રહ્યા હતા. નેટીઝન્સે NMIA ના આ પ્રયાસને 'માનવ-કેન્દ્રિત' અભિગમ ગણાવ્યો છે. ભલે આ ડ્રોન શો ખાનગી હતો, પણ તેની ગુંજ લાખો લોકો સુધી પહોંચી છે અને તેણે કોર્પોરેટ જગતને આભાર વ્યક્ત કરવાની નવી દિશા બતાવી છે.