મુંબઈ :  શેરબજારમાં વર્ષ 2025ના અંતિમ દિવસોમાં રોકાણકારો માટે કમાણીની મોટી તક સામે આવી છે. દેશની સર્વોચ્ચ બજાર નિયામક સંસ્થા SEBI એ ચાર મોટી કંપનીઓને તેમના આઈપીઓ (IPO) લાવવા માટે સત્તાવાર મંજૂરી આપી દીધી છે. આ કંપનીઓમાં એનએસી (NAC) પેકેજિંગ, શિવાલય કન્સ્ટ્રક્શન, વરમોરા ગ્રેનિટો અને બિહારી લાલ એન્જિનિયરિંગનો સમાવેશ થાય છે. આ ચારેય કંપનીઓ મળીને બજારમાંથી ₹1,400 કરોડથી વધુનું ભંડોળ એકત્ર કરવાની તૈયારી કરી રહી છે. SEBI એ 15 થી 26 ડિસેમ્બર દરમિયાન આ કંપનીઓના ડ્રાફ્ટ પેપર્સ પર પોતાનું સકારાત્મક નિરીક્ષણ આપ્યું છે, જેનો અર્થ છે કે હવે ગમે ત્યારે આ કંપનીઓ સબસ્ક્રિપ્શન માટે ખુલી શકે છે.

ગુજરાતના રોકાણકારો માટે ખાસ વાત એ છે કે રાજકોટ સ્થિત જાણીતી ટાઇલ્સ ઉત્પાદક 'વરમોરા ગ્રેનિટો' પણ મેદાનમાં છે. કંપની ₹400 કરોડના નવા શેર બહાર પાડશે અને તેની સાથે પ્રમોટર્સ પણ પોતાનો હિસ્સો વેચશે. આ ભંડોળનો ઉપયોગ કંપની તેના દેવાની ચુકવણી અને બિઝનેસના વિસ્તરણ માટે કરશે. તેવી જ રીતે, NAC પેકેજિંગ મહેસાણાના કડી પાસે નવું પ્લાન્ટ સ્થાપવા માટે ₹475 કરોડ એકત્ર કરી રહી છે. બીજી તરફ, શિવાલય કન્સ્ટ્રક્શન પણ ₹450 કરોડના ઈશ્યૂ દ્વારા પોતાના દેવાના બોજને હળવો કરવાનું લક્ષ્ય રાખી રહી છે. આ તમામ કંપનીઓ નવા વર્ષના પ્રારંભિક મહિનાઓમાં જ લિસ્ટિંગની તૈયારી કરી રહી છે.

વર્ષ 2025 ભારતીય આઈપીઓ માર્કેટ માટે ઐતિહાસિક સાબિત થયું છે. આ વર્ષે કંપનીઓએ બજારમાંથી અંદાજે ₹1.76 લાખ કરોડ એકત્ર કર્યા છે, જે 2024ના ₹1.6 લાખ કરોડના આંકડાને પણ વટાવી ગયો છે. રોકાણકારોનો અવિરત વિશ્વાસ અને મજબૂત આર્થિક વાતાવરણને કારણે બજારમાં આ તેજી જોવા મળી રહી છે. જોકે, આ દરમિયાન 'ઇન્ફો ફ્રેશ ફૂડ્સ' જેવી કેટલીક કંપનીઓએ તેમના ડ્રાફ્ટ પેપર્સ પાછા ખેંચીને સાવચેતીનો માર્ગ પણ અપનાવ્યો છે. આગામી સમયમાં આ નવા IPO થી બજારમાં લિક્વિડિટી વધશે અને નાના રોકાણકારોને સારા લિસ્ટિંગ ગેઈનની આશા રહેશે.