નવી દિલ્હી : દેશની સંરક્ષણ શક્તિને વધુ મજબૂત બનાવતા, પિનાકા લોંગ રેન્જ ગાઇડેડ રોકેટ (LRGR-120)નું પ્રથમ ઉડાન પરીક્ષણ સફળતાપૂર્વક પૂર્ણ થયું છે. આ પરીક્ષણ સોમવારે ઓડિશાના ચાંદીપુરમાં ઈન્ટીગ્રેટેડ ટેસ્ટ રેન્જમાં કરવામાં આવ્યું હતું. રોકેટે યોજના મુજબ તમામ દાવપેચ પૂર્ણ કર્યા અને ચોકસાઈ સાથે તેનું લક્ષ્ય હાંસલ કર્યું છે  .

   પરીક્ષણ દરમિયાન, રોકેટને તેની સંપૂર્ણ મહત્તમ 120 કિલોમીટરની રેન્જમાં છોડવામાં આવ્યું હતું. ઉડાન દરમિયાન, રોકેટે તમામ આયોજિત વળાંકો અને તકનીકી પ્રક્રિયાઓને સફળતાપૂર્વક પૂર્ણ કરી અને અંતે અત્યંત ચોકસાઈ સાથે લક્ષ્યને હિટ કર્યું. પરીક્ષણ દરમિયાન, રેન્જ પર સ્થાપિત તમામ સાધનોએ રોકેટની ઉડાનનો સમગ્ર સમય ટ્રેક કર્યો. કહેવામાં આવી રહ્યું છે કે આ રોકેટથી 120 કિમીના અંતરે હાજર દુશ્મનોને નિશાન બનાવી શકાય છે.

પિનાકા લોંગ રેન્જ ગાઈડેડ રોકેટને ડીઆરડીઓ (ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન)ના આર્મમેન્ટ રિસર્ચ એન્ડ ડેવલપમેન્ટ એસ્ટાબ્લિશમેન્ટ દ્વારા ડિઝાઈન કરવામાં આવ્યું છે. જેમાં હાઇ એનર્જી મટીરિયલ્સ રિસર્ચ લેબ, ડિફેન્સ રિસર્ચ એન્ડ ડેવલપમેન્ટ લેબ અને રિસર્ચ સેન્ટરનો સહકાર હતો.

આ ફ્લાઇટ ટેસ્ટ ITR અને પ્રૂફ અને એક્સપેરિમેન્ટલ એસ્ટાબ્લિશમેન્ટ દ્વારા કરવામાં આવી હતી. ખાસ વાત એ હતી કે સેનામાં પહેલાથી જ હાજર પિનાકા લોન્ચરથી રોકેટ છોડવામાં આવ્યું હતું, જેણે તેની બહુવિધ ક્ષમતા સાબિત કરી હતી. ભારતના આ પગલાથી પાડોશી દેશો પાકિસ્તાન અને ચીનની ઊંઘ હરામ થઈ ગઈ છે.