નવી દિલ્હી, તા.૩૦ : દેશના બહુચર્ચિત ઉન્નાવ બળાત્કાર કેસમાં સુપ્રીમ કોર્ટે એક મહત્વપૂર્ણ સુનાવણી દરમિયાન આકરી પ્રતિક્રિયા આપી છે. ભાજપના પૂર્વ નેતા કુલદીપ સિંહ સેંગરની સજા સ્થગિત કરવાના દિલ્હી હાઈકોર્ટના નિર્ણય બાદ સોશિયલ મીડિયા અને ન્યૂઝ ચેનલો પર જે રીતે ન્યાયાધીશોને નિશાન બનાવવામાં આવ્યા, તેના પર સર્વોચ્ચ અદાલતે ચિંતા વ્યક્ત કરી છે. ચીફ જસ્ટિસ સૂર્યકાંતની આગેવાની હેઠળની બેન્ચે સ્પષ્ટ શબ્દોમાં કહ્યું કે, "અમે કંઈ હાથીદાંતના ટાવરમાં બેઠા નથી, અમને સમજાય છે કે કેટલાક લોકો આ સ્થિતિનો રાજકીય લાભ લેવાનો પ્રયાસ કરી રહ્યા છે."

ન્યાયાધીશોની પ્રામાણિકતા પર સવાલ ઉઠાવવો અયોગ્ય

સેંગરના વકીલોએ કોર્ટનું ધ્યાન દોર્યું હતું કે રાષ્ટ્રીય ટેલિવિઝન અને સોશિયલ મીડિયા પર હાઈકોર્ટના ન્યાયાધીશોના ફોટા પ્રસારિત કરીને તેમની છબી ખરડવાના પ્રયાસો થઈ રહ્યા છે. આ અંગે સુપ્રીમ કોર્ટે ટકોર કરી કે જે ન્યાયાધીશોએ આદેશ આપ્યો છે તે ન્યાયતંત્રના શ્રેષ્ઠ અને પ્રામાણિક અધિકારીઓ છે. સોલિસિટર જનરલ તુષાર મહેતાએ પણ આ વાતને ટેકો આપતા કહ્યું કે, નિષ્કલંક પ્રતિભા ધરાવતા ન્યાયાધીશોને ડરાવવાના આવા કપટી પ્રયાસોની સખત નિંદા થવી જોઈએ.

કુલદીપ સેંગરની મુક્તિ પર સુપ્રીમ કોર્ટનો બ્રેક

દિલ્હી હાઈકોર્ટે તાજેતરમાં સેંગરની આજીવન કેદની સજા પેન્ડિંગ અપીલ દરમિયાન સ્થગિત કરી હતી, કારણ કે તે સાત વર્ષથી વધુ સમય જેલમાં વિતાવી ચૂક્યો છે. જોકે, સીબીઆઈએ આ આદેશને સુપ્રીમ કોર્ટમાં પડકાર્યો હતો. સુપ્રીમ કોર્ટે હાઈકોર્ટના આદેશ પર સ્ટે મૂકતા સ્પષ્ટ કર્યું છે કે સેંગરને અત્યારે કસ્ટડીમાંથી મુક્ત કરવામાં આવશે નહીં. કોર્ટે આ મામલે સેંગર પાસેથી ચાર અઠવાડિયામાં જવાબ પણ માંગ્યો છે.

જેલના સળિયા પાછળ જ રહેશે સેંગર

ભલે બળાત્કાર કેસમાં સજા સ્થગિત કરવાની વાત હોય, પરંતુ કુલદીપ સિંહ સેંગર માટે જેલમાંથી બહાર આવવું મુશ્કેલ છે. તે પીડિતાના પિતાના કસ્ટોડિયલ ડેથ (પોલીસ કસ્ટડીમાં મૃત્યુ) કેસમાં પણ ૧૦ વર્ષની સજા ભોગવી રહ્યો છે અને તે કેસમાં તેને હજુ જામીન મળ્યા નથી. ૨૦૧૭માં થયેલા આ જઘન્ય અપરાધ બાદ ૨૦૧૯માં સુપ્રીમ કોર્ટના આદેશથી જ આ કેસ ઉત્તર પ્રદેશથી દિલ્હી ટ્રાન્સફર કરવામાં આવ્યો હતો.