નાગપુર, તા.30 : મહારાષ્ટ્રની સ્થાનિક સ્વરાજ્યની ચૂંટણીઓ પહેલા નાગપુરમાં 'મહા વિકાસ આઘાડી' (MVA) ને મોટો ફટકો પડ્યો છે. નાગપુર મ્યુનિસિપલ કોર્પોરેશનની ચૂંટણીમાં કોંગ્રેસ અને શરદ પવારની આગેવાની હેઠળની NCP (SP) વચ્ચે ગઠબંધન તૂટી ગયું છે. બંને પક્ષોએ હવે અલગ-અલગ મેદાને ઉતરવાનો નિર્ણય કર્યો છે, જેનાથી વિપક્ષી એકતાના દાવાઓ પર સવાલો ઉભા થયા છે.

૧૫ બેઠકો માટે વાત બગડી

નાગપુર NCP (SP) ના પ્રમુખ દુનેશ્વર પેઠેએ ગંભીર આક્ષેપો કરતા જણાવ્યું હતું કે, ગઠબંધન માટે સોમવાર રાત સુધી કોંગ્રેસના નેતાઓ સાથે મંત્રણા ચાલી રહી હતી. NCP (SP) એ શરૂઆતમાં ૨૫ બેઠકોની માંગણી કરી હતી, પરંતુ અંતે તેઓ માત્ર ૧૫ બેઠકો પર સમાધાન કરવા તૈયાર હતા. જોકે, કોંગ્રેસના નેતાઓએ અંતિમ સમયે અચાનક ફોન ઉપાડવાનું બંધ કરી દીધું અને ગઠબંધન વગર જ આગળ વધવાનો સંકેત આપ્યો.

ભાજપને મદદ કરવાનો આક્ષેપ

NCP (SP) ના નેતાઓએ નારાજગી વ્યક્ત કરતા કહ્યું કે, કોંગ્રેસનું આ વલણ દર્શાવે છે કે તેઓ વાસ્તવમાં ભાજપને ફાયદો કરાવવા માંગે છે. ગઠબંધન ન થવાથી હવે મતોનું વિભાજન થશે, જેની સીધી અસર ચૂંટણીના પરિણામો પર પડી શકે છે. ૨૦૧૭ની છેલ્લી ચૂંટણીમાં ભાજપે ૧૫૧ માંથી ૧૦૮ બેઠકો જીતીને એકહથ્થુ શાસન જમાવ્યું હતું, જ્યારે કોંગ્રેસ માત્ર ૨૮ બેઠકો પર અટકી ગઈ હતી.

ચૂંટણીનું શિડ્યુલ અને મહત્વ

મહારાષ્ટ્રની ૨૯ નગર નિગમોમાં ૧૫ જાન્યુઆરીએ મતદાન થવાનું છે અને ૧૬ જાન્યુઆરીએ પરિણામ જાહેર થશે. ઉમેદવારી પત્રો ભરવાની અંતિમ તારીખ આજે (મંગળવાર) હોવાથી બંને પક્ષોએ ઉતાવળે પોતપોતાના ઉમેદવારો ઉતારવાની તૈયારી કરી લીધી છે. નાગપુરમાં ભાજપના ગઢને તોડવા માટે જે એકતાની જરૂર હતી, તે હવે વિખેરાઈ ગઈ હોય તેમ જણાય છે