શ્રીનગર, તા.૩૦ : નવા વર્ષ ૨૦૨૬ના આગમનને હવે ગણતરીના કલાકો બાકી છે ત્યારે જમ્મુ-કાશ્મીરમાં સુરક્ષા એજન્સીઓએ આતંકી ખતરાને જોતા કિલ્લેબંધી તેજ કરી દીધી છે. પ્રવાસીઓ અને સ્થાનિક નાગરિકોની સુરક્ષા સુનિશ્ચિત કરવા માટે સમગ્ર ઘાટી અને જમ્મુ ડિવિઝનમાં ‘મેક્સિમમ એલર્ટ’ જાહેર કરવામાં આવ્યું છે. ખાસ કરીને જ્યાં નવા વર્ષની પાર્ટીઓનું આયોજન થવાનું છે તેવા હોટલ અને જાહેર સ્થળો પર સુરક્ષા દળોએ અત્યારથી જ દેખરેખ અને સર્ચ ઓપરેશન શરૂ કરી દીધું છે.

પૂંછમાં પાકિસ્તાની ડ્રોન મળતા ખળભળાટ

સરહદી જિલ્લાઓમાં સુરક્ષા દળોને મોટી સફળતા મળી છે. ગુપ્ત માહિતીના આધારે કાર્યવાહી કરતા જમ્મુ-કાશ્મીર પોલીસના સ્પેશિયલ ઓપરેશન ગ્રુપ (SOG) એ પૂંછ જિલ્લાના મેંધાર સેક્ટરમાં આવેલા ગોહલેડ ગામના ખુલ્લા મેદાનમાંથી એક રહસ્યમય ડ્રોન જપ્ત કર્યું છે. આ ડ્રોન સરહદ પારથી હથિયારો કે ડ્રગ્સની હેરાફેરી માટે મોકલવામાં આવ્યું હોવાની શંકા છે. હાલ આ ડ્રોન ક્યાંથી આવ્યું અને તેનો ઓપરેટર કોણ હતો તેની ઝીણવટભરી તપાસ ચાલી રહી છે.

હથિયારોનો જથ્થો અને વિમાન આકારનો બલૂન જપ્ત

બીજી તરફ, ઉધમપુર જિલ્લાના ચેન્નાઈ વિસ્તારમાં સેનાએ સર્ચ ઓપરેશન દરમિયાન એકે-૪૭ રાઈફલનું મેગેઝિન અને સાત જીવતા કારતૂસ જપ્ત કર્યા છે. આ ઉપરાંત, અખનૂર સેક્ટરમાં પાકિસ્તાન ઇન્ટરનેશનલ એરલાઇન્સ (PIA) ના લોગોવાળો વિમાન આકારનો બલૂન મળી આવતા સુરક્ષા એજન્સીઓ સતર્ક થઈ ગઈ છે. આ ઘટનાઓ દર્શાવે છે કે સરહદ પાર બેઠેલા આકાઓ નવા વર્ષની ઉજવણીમાં ખલેલ પહોંચાડવાના ફિરાકમાં છે.

નાગરિકોને સતર્ક રહેવા અપીલ

તંત્ર દ્વારા તમામ પ્રવેશ બિંદુઓ અને મુખ્ય માર્ગો પર વધારાની ચેકપોસ્ટ ઉભી કરવામાં આવી છે. પોલીસ અને સેના દ્વારા સંયુક્ત રીતે આશ્ચર્યજનક ચેકિંગ અને વિસ્તાર પ્રભુત્વ (Area Dominance) કવાયત હાથ ધરવામાં આવી રહી છે. અધિકારીઓએ પ્રવાસીઓ અને સ્થાનિક લોકોને અપીલ કરી છે કે તેઓ કોઈપણ શંકાસ્પદ વસ્તુ કે વ્યક્તિ જણાય તો તાત્કાલિક પોલીસને જાણ કરે.