નવી દિલ્હી, તા.૩૦ : ઉત્તરાખંડના દેહરાદૂનમાં ત્રિપુરાના ૨૪ વર્ષીય વિદ્યાર્થી એન્જલ ચકમાની વંશીય ભેદભાવને કારણે થયેલી હત્યાએ દેશભરમાં ચર્ચા જગાવી છે. આ મામલે કોંગ્રેસના વરિષ્ઠ નેતા અને આસામના સાંસદ ગૌરવ ગોગોઈએ કેન્દ્ર અને રાજ્ય સરકાર પર આકરા પ્રહારો કર્યા છે. ગોગોઈએ સ્પષ્ટ શબ્દોમાં કહ્યું કે, "ઉત્તર-પૂર્વીય રાજ્યોના લોકો ભારતીય છે, ચીની નથી. એન્જલ ચકમાનો ગુનો માત્ર એટલો હતો કે તેણે પોતાની ભારતીય હોવાની ઓળખ સાબિત કરવાનો પ્રયાસ કર્યો હતો."

પોલીસની નિષ્ક્રિયતા પર સવાલો

ગૌરવ ગોગોઈએ પત્રકાર પરિષદમાં આરોપ લગાવ્યો કે આ મામલે એફઆઈઆર (FIR) નોંધવામાં પોલીસને ૧૨ દિવસનો સમય લાગ્યો. તેમણે કહ્યું કે જો પોલીસે સમયસર કાર્યવાહી કરી હોત તો મુખ્ય આરોપી, જે નેપાળનો વતની છે, તે દેશ છોડીને ભાગી શક્યો ન હોત. જ્યારે અન્ય વિદ્યાર્થીઓએ આકરા વિરોધ પ્રદર્શનો કર્યા, ત્યારે જ પોલીસ જાગી અને તપાસ શરૂ કરી. આ વિલંબ બદલ તેમણે જવાબદારો સામે તપાસની માંગ કરી છે.

વંશીય અપમાન સામે શૂન્ય સહિષ્ણુતાની માંગ

ઘટનાની વિગતો આપતા ગોગોઈએ જણાવ્યું કે ૯ ડિસેમ્બરના રોજ જ્યારે એન્જલ બજારમાંથી પરત ફરી રહ્યો હતો, ત્યારે કેટલાક લોકોએ તેને 'ચીની' કહીને અપમાનિત કર્યો હતો. એન્જલે આ અપમાન સહન કરવાને બદલે પ્રતિકાર કર્યો અને કહ્યું કે તે ભારતીય છે. આ સામાન્ય દલીલબાજી હિંસક હુમલામાં ફેરવાઈ ગઈ, જેમાં અંતે એન્જલે જીવ ગુમાવ્યો. ગોગોઈએ માંગ કરી છે કે આ કેસમાં દોષિતોને એવી કડક સજા થવી જોઈએ કે જેથી દેશમાં વંશીય ગુનાઓ માટે 'ઝીરો ટોલરન્સ'નો સંદેશ પહોંચે.

સંસ્કૃતિ અને ઇતિહાસની સમજનો અભાવ

ગોગોઈએ પૂર્વોત્તરના ઈતિહાસ અને સંસ્કૃતિ વિશે જાગૃતિ લાવવાની જરૂરિયાત પર ભાર મૂકતા કહ્યું કે, જે ત્રિપુરાના ઉનાકોટીથી એન્જલ આવતો હતો, તે પ્રદેશ પ્રાચીન શિવ મંદિરો માટે જાણીતો છે. તેમણે દુઃખ વ્યક્ત કર્યું કે ઉત્તર-પૂર્વના વિદ્યાર્થીઓ ઉજ્જવળ ભવિષ્ય માટે દેશના અન્ય ભાગોમાં જાય છે, પરંતુ તેમને વંશીય પૂર્વગ્રહોને કારણે પોતાના જીવનું જોખમ ખેડવું પડે છે. આસામના કાર્બી આંગલોંગ જિલ્લાના ઉદાહરણ ટાંકીને તેમણે કહ્યું કે ખુદ વતનીઓને પણ પોતાની ધરતી પર જ ભેદભાવનો સામનો કરવો પડી રહ્યો છે.