મૈમનસિંઘ : બાંગ્લાદેશના મૈમનસિંઘ જિલ્લામાં આવેલી એક કપડાની ફેક્ટરીમાં સોમવારે સાંજે એક હૃદયદ્રાવક ઘટના બની છે. ફેક્ટરીની સુરક્ષામાં તૈનાત ‘બાંગ્લાદેશ અંસાર’ દળના બે સાથીદારો વચ્ચેની બેઠક દરમિયાન થયેલા ગોળીબારમાં ૪૦ વર્ષીય હિન્દુ સુરક્ષાકર્મી બજેન્દ્ર બિશ્વાસનું કરુણ મોત નીપજ્યું છે. પ્રાથમિક તપાસમાં પોલીસ આ ઘટનાને ‘આકસ્મિક ગોળીબાર’ ગણાવી રહી છે, પરંતુ મામલાની સંવેદનશીલતા જોતા તપાસ તેજ કરવામાં આવી છે.

સાથે બેઠા હતા અને અચાનક ગોળી છૂટી

ઘટનાની વિગતો મુજબ, ભાલુકા ઉપજિલ્લાના મેહરાબારી વિસ્તારમાં સ્થિત ‘સુલતાના સ્વેટર્સ લિમિટેડ’માં અંદાજે ૨૦ જેટલા સુરક્ષા કર્મચારીઓ ફરજ પર હતા. મૃતક બજેન્દ્ર બિશ્વાસ અને ૨૨ વર્ષીય આરોપી નોમાન મિયા એકસાથે બેઠા હતા. આ દરમિયાન નોમાનના કબજામાં રહેલી લોડેડ શોટગનમાંથી અચાનક ગોળી છૂટી ગઈ હતી. આ ગોળી સીધી બજેન્દ્રની ડાબી જાંઘમાં વાગી હતી, જેના કારણે પુષ્કળ રક્તસ્ત્રાવ થયો હતો. ફેક્ટરીના અન્ય કર્મચારીઓ તાત્કાલિક તેમને હોસ્પિટલ લઈ ગયા હતા, પરંતુ રસ્તામાં જ તેમણે અંતિમ શ્વાસ લીધા હતા.

પોલીસે આરોપીની કરી ધરપકડ

બજેન્દ્ર બિશ્વાસ મૂળ સિલહટના કાદિરપુર ગામના રહેવાસી હતા. આ ઘટના બાદ ફેક્ટરીમાં ગભરાટ ફેલાઈ ગયો હતો. ભાલુકા મોડેલ પોલીસ સ્ટેશનના અધિકારી ઝાહિદુલ ઇસ્લામે જણાવ્યું કે, ગોળીબાર કરનાર નોમાન મિયાની ધરપકડ કરી લેવામાં આવી છે અને તેની શોટગન પણ જપ્ત કરવામાં આવી છે. આરોપી નોમાન સુનમગંજ વિસ્તારનો વતની છે. પોલીસે મૃતદેહને શબપરીક્ષણ માટે મૈમનસિંહ મેડિકલ કોલેજ હોસ્પિટલમાં મોકલી આપ્યો છે.

તપાસના ઘેરામાં આકસ્મિક ગોળીબારનો દાવો

બાંગ્લાદેશમાં અંસાર-VDP એ એક મહત્વપૂર્ણ ગણવેશધારી સહાયક દળ છે, જે બેંકો અને ફેક્ટરીઓ જેવી સંવેદનશીલ જગ્યાએ હથિયાર સાથે સુરક્ષા પૂરી પાડે છે. જોકે પોલીસે આને અકસ્માત ગણાવ્યો છે, પરંતુ તપાસકર્તાઓ એ પાસા પર પણ કામ કરી રહ્યા છે કે શું આ ખરેખર બેદરકારી હતી કે પછી કોઈ અંગત અદાવત. ફેક્ટરીમાં હાજર અન્ય સાક્ષીઓના નિવેદન લેવાની પ્રક્રિયા ચાલી રહી છે જેથી સત્ય બહાર આવી શકે.