નવી દિલ્હી : વડાપ્રધાન નરેન્દ્ર મોદીએ વર્ષ ૨૦૨૫ને ભારતની સુધારા યાત્રામાં એક ઐતિહાસિક વળાંક તરીકે ઓળખાવ્યું છે. સોશિયલ મીડિયા પ્લેટફોર્મ લિંક્ડઇન (LinkedIn) પર લખેલા એક લેખમાં વડાપ્રધાને જણાવ્યું કે, ભારત હવે 'રિફોર્મ એક્સપ્રેસ'માં સવાર થઈ ગયું છે, જેની ગતિ અને શક્તિ આપણી યુવા પેઢી અને ૧૪૦ કરોડ દેશવાસીઓની અદમ્ય ભાવના છે. તેમણે ભારપૂર્વક કહ્યું કે વિશ્વ આજે ભારતને માત્ર એક બજાર તરીકે નહીં, પરંતુ આશા અને વિશ્વાસના કેન્દ્ર તરીકે જોઈ રહ્યું છે.

આર્થિક સુધારા: મધ્યમ વર્ગ અને ઉદ્યોગોને મોટી રાહત

પીએમ મોદીએ તેમના લેખમાં કરવેરા પદ્ધતિમાં થયેલા મોટા ફેરફારોનો ઉલ્લેખ કર્યો છે. GSTના માળખાને ૫% અને ૧૮%ના બે મુખ્ય સ્લેબમાં વહેંચીને પાલન પ્રક્રિયા સરળ બનાવવામાં આવી છે. સૌથી મોટી રાહત મધ્યમ વર્ગને આપતા તેમણે જણાવ્યું કે, હવે વાર્ષિક ૧૨ લાખ રૂપિયા સુધીની આવક ધરાવતા લોકોએ કોઈ આવકવેરો ચૂકવવો પડતો નથી. આ ઉપરાંત, ૧૯૬૧ના જૂના આવકવેરા કાયદાને બદલીને ૨૦૨૫માં નવો, ટેકનોલોજી આધારિત કાયદો લાવવામાં આવ્યો છે જે પારદર્શિતા વધારશે.

બિઝનેસ અને રોકાણ માટે લાલ જાજમ

ભારતને રોકાણકારો માટે સ્વર્ગ બનાવવાના પ્રયાસરૂપે વીમા ક્ષેત્રમાં ૧૦૦% વિદેશી સીધા રોકાણ (FDI)ને મંજૂરી આપવામાં આવી છે. વડાપ્રધાને નોંધ્યું કે વસાહતી યુગના સેંકડો જૂના કાયદાઓ રદ કરીને ‘ઈઝ ઓફ ડુઈંગ બિઝનેસ’ને પ્રોત્સાહન આપવામાં આવ્યું છે. નાના ઉદ્યોગો (MSMEs) માટે ૧૦૦ કરોડ સુધીના ટર્નઓવરની મર્યાદા વધારીને હજારો કંપનીઓનો કમ્પ્લાયન્સ બોજ ઘટાડવામાં આવ્યો છે. આ સુધારાઓથી સ્થાનિક ઉદ્યોગસાહસિકોમાં નવો આત્મવિશ્વાસ જાગ્યો છે.

શ્રમ સુધારા અને ગ્રામીણ ઉત્થાન

૨૯ જટિલ શ્રમ કાયદાઓને ચાર સરળ સંહિતાઓમાં મર્જ કરીને સરકારે કામદારોની સુરક્ષા અને વેતન વ્યવસ્થાને વધુ મજબૂત બનાવી છે. ખાસ કરીને અસંગઠિત ક્ષેત્રના કામદારો અને મહિલાઓની ભાગીદારી વધે તેવા પ્રયાસો કરવામાં આવ્યા છે. ગ્રામીણ રોજગાર ક્ષેત્રે 'વિકાસ ભારત-ગ્રામ રોજગાર ગેરંટી' હેઠળ કામના દિવસો ૧૦૦થી વધારીને ૧૨૫ કરવામાં આવ્યા છે, જે ગ્રામીણ અર્થતંત્રને નવી મજબૂતી આપશે.

વૈશ્વિક ભાગીદારી માટે આહ્વાન

પીએમ મોદીએ અંતમાં વિશ્વભરના રોકાણકારો અને સંશોધકોને ભારતમાં રોકાણ કરવા આમંત્રણ આપ્યું હતું. તેમણે કહ્યું કે, "ભારત પર વિશ્વાસ રાખો અને આપણા લોકોમાં રોકાણ કરો." ન્યુઝીલેન્ડ, ઓમાન અને યુકે સાથેના વેપાર કરારો તેમજ યુરોપિયન ફ્રી ટ્રેડ એસોસિએશન (EFTA) સાથેના કરારથી ભારત હવે વૈશ્વિક સપ્લાય ચેઈનમાં એક અનિવાર્ય ભાગીદાર બની ગયું છે. ૨૦૨૫ના આ સુધારાઓ ભારતને 'વિકસિત ભારત' બનાવવાના માર્ગે લઈ જશે.