નવી દિલ્હી : વિશ્વના સૌથી લોકપ્રિય ઇન્સ્ટન્ટ મેસેજિંગ પ્લેટફોર્મ WhatsApp એ વર્ષ ૨૦૨૬ના આગમનને યાદગાર બનાવવા માટે યુઝર્સ માટે ફીચર્સનો નવો ખજાનો ખોલી દીધો છે. વર્ષના સૌથી વ્યસ્ત દિવસ એટલે કે ૧લી જાન્યુઆરીએ જ્યારે વિશ્વભરમાં અબજો મેસેજ અને કોલ્સની આપ-લે થાય છે, ત્યારે મેટા-માલિકીની આ કંપનીએ રજાઓની શુભેચ્છાઓમાં ‘ઉત્સવનો સ્પર્શ’ ઉમેરવા માટે ચાર નવી શક્તિશાળી સુવિધાઓ રજૂ કરી છે.

વીડિયો કોલ બનશે રંગીન

હવે જો તમે નવા વર્ષે તમારા પરિવાર કે મિત્રોને વીડિયો કોલ કરશો, તો સ્ક્રીન પર ફટાકડા, તારાઓ અને કોન્ફેટી (રંગીન કાગળના ટુકડા) ઉડતા જોવા મળશે. યુઝર્સ કોલ દરમિયાન ‘ઇફેક્ટ્સ’ ઓપ્શનમાં જઈને આ આકર્ષક વિઝ્યુઅલ ઇફેક્ટ્સ પસંદ કરી શકે છે. આ ઉપરાંત, ચેટમાં મેસેજ પર રિએક્શન આપતી વખતે ‘કોન્ફેટી ઇમોજી’ વાપરતા જ આખી ચેટ વિન્ડો એનિમેશનથી ભરાઈ જશે.

સ્ટેટસમાં પહેલીવાર એનિમેટેડ સ્ટીકરો

WhatsApp એ તેના સ્ટેટસ ફીચરમાં પણ મોટું અપગ્રેડ કર્યું છે. પહેલીવાર યુઝર્સ સ્ટેટસ અપડેટમાં એનિમેટેડ સ્ટીકરોનો ઉપયોગ કરી શકશે. એટલું જ નહીં, ૨૦૨૬-થીમ આધારિત ખાસ લેઆઉટ પણ તૈયાર કરવામાં આવ્યા છે, જેથી યુઝર્સ વધુ આકર્ષક રીતે નવા વર્ષની શુભકામનાઓ શેર કરી શકે. ૨૦૨૬ના ખાસ સ્ટીકર પેકને પણ લાઈવ કરી દેવામાં આવ્યા છે, જે યુઝર્સ સીધા ડાઉનલોડ કરી શકશે.

ગ્રુપ પાર્ટીનું આયોજન થશે સરળ

નવા વર્ષની ઉજવણીમાં આયોજનની ઝંઝટ ઓછી કરવા માટે WhatsApp એ ‘બિલ્ટ-ઇન ટૂલ્સ’ પર ભાર મૂક્યો છે. હવે ગ્રુપ ચેટમાં ‘ઇવેન્ટ’ બનાવીને તેને પિન કરી શકાશે, જેથી દરેકને ખબર પડે કે પાર્ટી ક્યારે અને ક્યાં છે. કોણ આવશે અને કોણ નહીં તેના માટે ‘RSVP’ પણ એકત્રિત કરી શકાશે. જો ખાવા-પીવાની પસંદગીમાં મૂંઝવણ હોય તો ‘પોલ’ (Poll) દ્વારા મતદાન કરાવી શકાશે અને ‘લાઇવ લોકેશન’ દ્વારા મહેમાનો રસ્તો ભુલ્યા વગર સ્થળ પર પહોંચી શકશે.

૧૦૦ અબજ મેસેજની તૈયારી

વોટ્સએપના ડેટા મુજબ, નવા વર્ષના દિવસે સરેરાશ ૧૦૦ અબજથી વધુ સંદેશાઓ અને લગભગ ૨ અબજ કોલ્સ થાય છે. આ અતિશય ટ્રાફિકને ધ્યાનમાં રાખીને સર્વર ક્ષમતા અને નવીનતમ સુવિધાઓ સાથે પ્લેટફોર્મ સજ્જ થઈ ગયું છે. યુઝર્સ હવે વોઈસ અને વિડિયો નોટ્સ દ્વારા પણ દૂર બેઠેલા સ્વજનોને સેલિબ્રેશનની લાઈવ પળો મોકલી શકશે.