ન્યૂટન-લે-વિલોઝ (મર્સીસાઇડ), તા.૩૧: બ્રિટનની એક હોસ્પિટલમાં માનવતા અને સુરક્ષા પર સવાલ ઉઠાવતી એક અત્યંત ભયાનક ઘટના સામે આવી છે. ૨૮ વર્ષીય ડિસ્ટ્રિક્ટ નર્સ મેગ લિંચે આજે દુનિયા સામે ખુલાસો કર્યો કે કેવી રીતે હોસ્પિટલના વેઇટિંગ રૂમમાં તેમના પર લોખંડના સળિયા (Crowbar) વડે જીવલેણ હુમલો કરવામાં આવ્યો હતો. મેગના જણાવ્યા અનુસાર, જો તે સમયે તે જીવ બચાવીને ભાગી ન હોત, તો કદાચ આજે તે જીવિત ન હોત.
પીઠ પાછળથી કર્યો હુમલો
ઘટના ત્યારે ઘટી જ્યારે નર્સ મેગ લિંચ બપોરના સમયે વેન્ડિંગ મશીનમાંથી પીણું લઈ રહી હતી. એ સમયે અફઘાનિસ્તાનથી આવેલા ૨૦ વર્ષીય યુવકે કોઈ પણ ઉશ્કેરણી વગર પાછળથી તેના માથામાં લોખંડના સળિયાના ઘા મારવાનું શરૂ કર્યું. મેગ કહે છે, "મને લગભગ મોતને ઘાટ ઉતારી દેવામાં આવી હતી. માથામાં થોડા ફટકા લાગ્યા પછી, હું લોહીલુહાણ હાલતમાં દોડી અને મારી તથા હુમલાખોર વચ્ચે દરવાજો આડો કરી પોતે છુપાઈ ગઈ."
હોસ્પિટલમાં અંધાધૂંધી અને છ લોકો ઘાયલ
પોલીસ અહેવાલ મુજબ, આ હુમલાખોરે માત્ર મેગ જ નહીં, પરંતુ હોસ્પિટલના અન્ય સ્ટાફ સહિત કુલ છ લોકો પર હુમલો કર્યો હતો. એવું કહેવામાં આવી રહ્યું છે કે હુમલાખોરને હોસ્પિટલમાં એપોઇન્ટમેન્ટ ન મળતા તે ઉશ્કેરાઈ ગયો હતો. તમામ ઘાયલોને માથા અને હાથના ભાગે ગંભીર ઈજાઓ પહોંચી છે. મેગ લિંચને વિસ્ટન A&E હોસ્પિટલમાં સીટી સ્કેન અને એક્સ-રે માટે લઈ જવામાં આવી હતી, જ્યાં તેના માથાના ઘા પર ટાંકા લેવા પડ્યા હતા.
માનસિક સ્વાસ્થ્ય કાયદા હેઠળ અટકાયત
મર્સીસાઇડ પોલીસે ઘટનાસ્થળેથી જ ૨૦ વર્ષીય શંકાસ્પદની ધરપકડ કરી હતી. જોકે, તેની માનસિક સ્થિતિને જોતા હવે તેને માનસિક સ્વાસ્થ્ય કાયદાની કલમ ૧૩૬ હેઠળ અટકાયતમાં લેવામાં આવ્યો છે. હોસ્પિટલ પરિસરમાં હાલમાં ચુસ્ત પોલીસ બંદોબસ્ત ગોઠવી દેવામાં આવ્યો છે અને એક મોબાઈલ પોલીસ સ્ટેશન પણ કાર્યરત કરવામાં આવ્યું છે જેથી દર્દીઓ અને સ્ટાફમાં વિશ્વાસ જળવાઈ રહે.
પોતાના નર્સિંગ કરિયરનું પહેલું વર્ષ હજુ માંડ પૂરું કરનાર મેગ અત્યારે પોતાના પરિવાર સાથે ઘરે છે, પરંતુ આ આઘાતમાંથી બહાર આવતા તેને સમય લાગશે. સોશિયલ મીડિયા પર તેને સમર્થન આપતા સંદેશાઓનો પ્રવાહ વહી રહ્યો છે. સાથી નર્સો અને વિદ્યાર્થીઓએ મેગની દયા અને હૂંફની પ્રશંસા કરતા આ હુમલાખોર સામે કડક કાર્યવાહીની માંગ કરી છે. આ ઘટનાએ ફરી એકવાર ફ્રન્ટલાઈન હેલ્થ વર્કર્સની સુરક્ષા અંગે મોટા પ્રશ્નાર્થ ચિન્હો ઉભા કર્યા છે.