અમદાવાદ:  નવા વર્ષની શરૂઆત સાથે જ ઈલેક્ટ્રોનિક ઉપકરણોના બજારમાં એક મોટો અને ક્રાંતિકારી ફેરફાર થવા જઈ રહ્યો છે. સરકારના ઉર્જા મંત્રાલય દ્વારા લેવાયેલા નિર્ણય મુજબ, 1 જાન્યુઆરી 2026 થી રેફ્રિજરેટર, ટેલિવિઝન અને ડીપ ફ્રીઝરની સાથે હવે LPG ગેસ સ્ટવ માટે પણ સ્ટાર રેટિંગ ફરજિયાત બનાવી દેવામાં આવ્યું છે. અત્યાર સુધી આ ઉપકરણો પર રેટિંગ દર્શાવવું સ્વૈચ્છિક હતું, પરંતુ હવે કંપનીઓએ ગ્રાહકોને જણાવવું પડશે કે તેમનું સાધન કેટલી વીજળી કે ઈંધણ વાપરે છે. આ પગલાથી બજારમાં હલકી ગુણવત્તાના અને વધુ વીજળી ખેંચતા સાધનોના વેચાણ પર બ્રેક લાગશે.

BEE સ્ટાર રેટિંગની સિસ્ટમ સામાન્ય માણસ માટે સમજવી ખૂબ જ સરળ છે. જે ઉપકરણ પર 5 સ્ટાર હોય તે સૌથી ઓછી વીજળી વાપરે છે, જ્યારે 1 સ્ટાર ધરાવતું સાધન વધુ વીજળીનો વપરાશ કરે છે. નવા નિયમો હેઠળ હવે ગ્રીડ-કનેક્ટેડ સોલર ઇન્વર્ટર અને કૂલિંગ ટાવરને પણ આ યાદીમાં સામેલ કરવામાં આવ્યા છે. જુલાઈ 2025 માં મંગાવવામાં આવેલા જનતાના પ્રતિસાદ બાદ આ આખરી નિર્ણય લેવાયો છે. સરકારનો ઉદ્દેશ્ય છે કે ભારતીય ઘરોમાં ઊર્જાનો બચાવ થાય, જેથી ગ્રાહકોના માસિક બિલમાં ઘટાડો થાય અને દેશની કુલ વીજળીની માંગ પરનું દબાણ પણ ઓછું કરી શકાય.

આ નિયમ માત્ર ઈલેક્ટ્રિક સાધનો પૂરતો મર્યાદિત નથી, પરંતુ હવે રસોડામાં વપરાતા LPG ગેસ સ્ટવ પર પણ રેટિંગ જોવા મળશે. આનાથી ગ્રાહકો એ જાણી શકશે કે કયો સ્ટવ ગેસની ઓછી ખપત કરે છે, જેનાથી રાંધણ ગેસના ખર્ચમાં પણ લાંબાગાળે મોટી બચત થશે. વેપારીઓ અને ઉત્પાદકો માટે હવે જૂનો સ્ટોક ક્લિયર કરવો અને નવા માપદંડો મુજબના સાધનો બજારમાં મૂકવા એક પડકાર રહેશે. જોકે, ગ્રાહકો માટે આ 'નવા વર્ષની ભેટ' સમાન છે, કારણ કે હવે તેઓ પૂરી પારદર્શિતા સાથે સ્માર્ટ ખરીદી કરી શકશે.