નવી દિલ્હી: તા.૦૧: ભારતીય રેલવેના ઇતિહાસમાં એક નવું સુવર્ણ પ્રકરણ ઉમેરાવા જઈ રહ્યું છે. કેન્દ્રીય રેલવે મંત્રી અશ્વિની વૈષ્ણવે જાહેરાત કરી છે કે ભારતની સૌપ્રથમ 'વંદે ભારત સ્લીપર' ટ્રેન ગુવાહાટી અને કોલકાતા વચ્ચે દોડવા માટે સજ્જ છે. વડાપ્રધાન નરેન્દ્ર મોદી આગામી ૧૭ થી ૧૮ દિવસમાં આ હાઈ-ટેક ટ્રેનનું ઉદ્ઘાટન કરશે. આ ટ્રેન માત્ર મુસાફરીનો સમય જ નહીં ઘટાડે, પરંતુ મુસાફરોને ફાઈવ-સ્ટાર હોટલ જેવી સુવિધાઓ પણ પૂરી પાડશે.
ઝડપ અને સુરક્ષાનો અદભૂત સંગમ
આ ટ્રેનની સૌથી મોટી વિશેષતા તેની ઝડપ છે. 180 કિમી પ્રતિ કલાકની ક્ષમતા ધરાવતી આ ટ્રેનનું ટ્રાયલ રન સફળતાપૂર્વક પૂર્ણ થઈ ગયું છે. સુરક્ષા માટે તેમાં સ્વદેશી 'કવચ' સિસ્ટમ અને ઇમરજન્સી ટોક-બેક સિસ્ટમ લગાવવામાં આવી છે. આ ટ્રેનમાં કુલ ૧૬ કોચ હશે, જેમાં ૩-ટાયર એસીના ૧૧ કોચ, ૨-ટાયર એસીના ૪ કોચ અને ૧ ફર્સ્ટ એસી કોચનો સમાવેશ થાય છે. જેની કુલ મુસાફર ક્ષમતા ૮૨૩ છે.
ભોજનમાં જોવા મળશે પ્રાદેશિક સ્વાદ
વંદે ભારત સ્લીપર ટ્રેનમાં મુસાફરોને આધુનિકતાની સાથે પરંપરાગત સ્વાદનો પણ અનુભવ થશે. ગુવાહાટીથી ઉપડતી વખતે ટ્રેનમાં આસામી ભોજન પીરસવામાં આવશે, જ્યારે કોલકાતાથી વળતી મુસાફરીમાં બંગાળી વાનગીઓની મિજબાની માણી શકાશે. આ યાત્રા મુખ્યત્વે રાત્રિની રહેશે, જેમાં મુસાફરોને રાત્રિભોજન અને સવારે ચા-નાસ્તાની સુવિધા મળશે.
કેટલો ખર્ચ થશે ખિસ્સા પર?
રેલવે મંત્રીએ અંદાજિત ભાડાની પણ વિગતો આપી છે:
•    3-ટાયર એસી: અંદાજે ₹૨,૩૦૦
•    2-ટાયર એસી: અંદાજે ₹૩,૦૦૦
•    ફર્સ્ટ એસી: અંદાજે ₹૩,૬૦૦
ભવિષ્યનું આયોજન
આગામી છ મહિનામાં સરકાર આવી વધુ ૮ સ્લીપર ટ્રેનો શરૂ કરવાનું લક્ષ્ય ધરાવે છે અને વર્ષના અંત સુધીમાં આ સંખ્યા ૨૦ સુધી પહોંચાડવાનું આયોજન છે. આ લોન્ચિંગ આસામ અને પશ્ચિમ બંગાળની આગામી વિધાનસભા ચૂંટણીઓ પહેલા કરવામાં આવ્યું છે, જે પૂર્વીય ભારતમાં રેલવે કનેક્ટિવિટીના નવા દ્વાર ખોલશે. આ ટ્રેન અઠવાડિયામાં ૬ દિવસ દોડશે.