રોમ : જ્યારે દુનિયાભરના શક્તિશાળી નેતાઓ નવા વર્ષના ઔપચારિક સંદેશા આપવામાં વ્યસ્ત હતા, ત્યારે ઇટાલીના વડાપ્રધાન જ્યોર્જિયા મેલોનીએ એક એવો ફોટો શેર કર્યો જેણે ઈન્ટરનેટ પર આગ લગાવી દીધી છે. બ્લેક હાઈ-નેક આઉટફિટ, જેના પર ઝીણું ચમકતું કામ કરેલું હતું, તેમાં મેલોની અત્યંત પ્રભાવશાળી દેખાતા હતા. બોલ્ડ રેડ લિપ્સ અને સ્મોકી આઈ મેકઅપ સાથેના તેમના આ 'પાવર લુક' એ સાબિત કરી દીધું કે રાજનીતિના મેદાનમાં કઠોર નિર્ણયો લેનારી આ મહિલા ફેશન અને ગ્રેસના મામલે પણ કોઈથી ઉતરતી નથી. હાથમાં ગ્લાસ અને ચહેરા પર આત્મવિશ્વાસભર્યું સ્મિત સાથેનો તેમનો ફોટો જોતજોતામાં વાયરલ થઈ ગયો હતો.

પોતાના સંદેશમાં મેલોનીએ માત્ર શુભેચ્છાઓ જ નથી પાઠવી, પરંતુ ૨૦૨૬ના વર્ષ માટે પોતાનો દ્રઢ સંકલ્પ પણ રજૂ કર્યો છે. તેમણે X પર લખ્યું, "મે ૨૦૨૬ શાંતિ, હિંમત અને સિદ્ધિઓનું વર્ષ બની રહે." તેમણે ઇટાલીના લોકોને એકજૂથ થઈને કંઈક મોટું નિર્માણ કરવા માટે આહવાન કર્યું હતું. આ સંદેશમાં એક ગંભીર રાષ્ટ્રપ્રમુખની જવાબદારી અને પોતાના દેશ પ્રત્યેનો અતૂટ પ્રેમ સ્પષ્ટપણે દેખાતો હતો. મેલોનીએ જે રીતે પોતાની રાષ્ટ્રીય ઓળખ અને આંતરરાષ્ટ્રીય નેતૃત્વ વચ્ચે સંતુલન જાળવ્યું છે, તેના વખાણ માત્ર ઇટાલીમાં જ નહીં પરંતુ સાત સમંદર પાર અમેરિકામાં પણ થઈ રહ્યા છે.

મેલોનીની આ પોસ્ટ પર પ્રતિક્રિયાઓનો ધોધ વછૂટ્યો છે. કેલિફોર્નિયાના પ્રશંસકોએ તેમને 'ચમકતો તારો' ગણાવ્યા છે, તો ઇટાલીના લોકોએ તેમને નિશ્ચય અને દેશભક્તિનું પ્રતીક ગણાવી નવા વર્ષની વધાઈ આપી છે. લોકોનું કહેવું છે કે આજના અનિશ્ચિતતાના સમયમાં મેલોની જેવું મજબૂત અને સ્પષ્ટવક્તા નેતૃત્વ વિશ્વ માટે આશાનું કિરણ છે. મેલોનીએ જે રીતે પોતાના લુક અને લખાણથી પ્રભાવ પાડ્યો છે, તે જોતા કહી શકાય કે ૨૦૨૬માં પણ ગ્લોબલ લીડર્સની યાદીમાં તેમનું કદ ઘણું ઊંચું રહેવાનું છે.