બેંગલુરુમાં ગેરકાયદેસર રોક બ્લાસ્ટિંગને કારણે ૪ દીપડાના મોત
પોસ્ટમોર્ટમમાં માદા દીપડાના ગર્ભમાં ૩ બચ્ચાના મોતના ખુલાસાથી વનપ્રેમીઓમાં રોષ ખડકોના ટુકડાઓથી વન્યજીવોના શરીર વિંધાયા!
બેંગલુરુ, તા.૨: કર્ણાટકની રાજધાની બેંગલુરુના પાદરે આવેલા કાગલીપુરા રેન્જમાં માનવતાને શરમાવે તેવી ઘટના સામે આવી છે. બસવનપુરા જંગલ વિસ્તારમાં એક સાથે ચાર દીપડાના લોહીલુહાણ અને વિકળત મળતદેહો મળી આવતા વન વિભાગમાં દોડધામ મચી ગઈ છે. ઘટનાસ્થળની તપાસ કરતા વન અધિકારીઓને લોહીથી લથપથ પથ્થરોના મોટા ટુકડાઓ મળી આવ્યા હતા, જે સૂચવે છે કે આ પ્રાણીઓ કોઈ ભયાનક અકસ્માતનો ભોગ બન્યા છે. પોસ્ટમોર્ટમ રિપોર્ટમાં હૃદયદ્રાવક સત્ય બહાર આવ્યું છે કે મળતક દીપડાઓમાં એક ગર્ભવતી માદા હતી, જે તેના ગર્ભમાં ત્રણ બચ્ચાને ઉછેરી રહી હતી. એક જ બ્લાસ્ટમાં કુલ ૭ જિંદગીઓ (૪ પુખ્ત દીપડા અને ૩ અજન્મા બચ્ચા) હોમાઈ ગઈ છે.
પ્રાથમિક તપાસ મુજબ, આ દુર્ઘટના પાછળ જંગલની સરહદે ચાલતું ગેરકાયદેસર રોક બ્લાસ્ટિંગ જવાબદાર છે. જે સમયે દીપડાઓ જંગલમાં ફરી રહ્યા હતા, તે જ સમયે નજીકની ખાણમાં શક્તિશાળી વિસ્ફોટ કરવામાં આવ્યો હતો. આ વિસ્ફોટને કારણે હવામાં ઉછળેલા ખડકોના વિશાળ ટુકડાઓ સીધા દીપડાઓ પર પડ્યા હતા, જેના કારણે તેમના શરીર કચડાઈ ગયા હતા. દીપડાના અંગો વિખરાયેલા હોવાથી આ ઘટનાની ભયાનકતાનો અંદાજ લગાવી શકાય છે. વન્યજીવ નિષ્ણાતોનું કહેવું છે કે વન વિભાગની નાક નીચે ચાલતા આવા ગેરકાયદેસર બ્લાસ્ટિંગે જંગલના ઇકોસિસ્ટમને જોખમમાં મૂકી દીધું છે.
આ ઘટનાએ હવે કર્ણાટકના રાજકારણમાં પણ ગરમાવો લાવી દીધો છે. યશવંતપુરના ભાજપના ધારાસભ્ય એસ.ટી. સોમશેખરે વન વિભાગ અને રાજ્ય સરકાર પર આકરા પ્રહારો કર્યા છે. તેમણે આરોપ લગાવ્યો છે કે આ વિસ્તારમાં મહિનાઓથી ગેરકાયદે ખનન માફિયાઓ સક્રિય છે, છતાં વનમંત્રી મૌન સેવી રહ્યા છે. સોમશેખરે વનમંત્રીને પત્ર લખીને સવાલ કર્યો છે કે, શું મૂંગા પ્રાણીઓના જીવની કોઈ કિંમત નથી? તેમણે આ મામલે ઉચ્ચસ્તરીય તપાસની માંગણી સાથે જવાબદારો સામે હત્યાનો ગુનો નોંધવા અને તત્કાલીન રેન્જ ઓફિસરને સસ્પેન્ડ કરવાની હાકલ કરી છે.
હાલમાં વન વિભાગે અજાણ્યા શખ્સો સામે કેસ નોંધીને તપાસના ચક્રો ગતિમાન કર્યા છે, પરંતુ હજુ સુધી કોઈની ધરપકડ કરવામાં આવી નથી. ગેરકાયદે બ્લાસ્ટિંગના કારણે જંગલમાં રહેતા અન્ય વન્યજીવો પણ ભયના ઓથાર હેઠળ છે. સ્થાનિક ગ્રામજનો પણ આ માફિયાઓથી પરેશાન છે, કારણ કે વિસ્ફોટોને કારણે તેમના મકાનોમાં તિરાડો પડી રહી છે. આ કરુણ ઘટનાએ ફરી એકવાર વન્યજીવ સંરક્ષણ અને ઉદ્યોગો વચ્ચેના સંઘર્ષને સપાટી પર લાવી દીધો છે. હવે જોવાનું એ રહેશે કે શું સરકાર આ ખાણ માફિયાઓ સામે કડક પગલાં લેશે કે પછી તપાસ માત્ર કાગળ પર જ સીમિત રહેશે
(12:03 PM IST)
છેલ્લા 8 દિવસમાં સૌથી લોકપ્રિય 
